Жамбыл облысында жасөспірімдер арасындағы қылмыс азайды
Полицейлер білім басқармасымен ынтымақтастықта жасөспірімдер арасындағы құқықбұзушылықтардың алдын алу мақсатында 2018 жылы 1 800-ге жуық шара өткізіліп, оған 218 мың оқушы қамтылған. Ортақ іске 200 директордың орынбасары, 350 әлеуметтік педагог, 550-ден астам педагог-психолог, 160 мектеп инспекторы жұмылдырылған.
Жамбыл облыстық полиция департаменті жергілікті полиция қызметінің ювеналдық полиция бөлімінің бастығы Қуанышбек Қалжановтың айтуынша, былтыр өңірде кәмелетке толмағандар арасындағы қылмыстар 18,1%, ал кәмелетке толмағандарға қатысты жасалған қылмыс фактілері 192-ден 152-ге қысқарған.
Былтыр ішкі істер органдарына құқық бұзды деген күдікпен кәмелетке толмаған 9 000 бала жеткізілген, 1 400 жасөспірім және 1 284 бала тұратын 792 жайсыз отбасы тіркелген. Жастар шоғырланған жерлерге 3 400 мәрте рейд ұйымдастырылып, кәмелетке толмағандардың бейімдеу орталығына 643 жасөспірім жеткізілген.
«Мектеп» жедел-алдын алу шарасы аясында әкімшілік құқықты бұзды деген күдікпен 199, қамқоршысыз, қараусыз қалған 253 - жалпы 491 жасөспірім жеткізілген.
«Жасөспірімдер арасындағы қылмысқа қарсы күреске білім беру жүйесінің қызметкерлері де, ата-аналар да, полиция да, үкіметтік емес ұйымдар да, жалпы жұртшылық та атсалысуда», - дейді Қуанышбек Қалжанов.