+7 (701) 759 90 19
USD 428.05 EUR 501.2
RUB 5.47 CNY 63.87
Jańalyqtar

Жамбыл облысында биыл 13 инвестициялық жоба іске асырылып жатыр

2020 жылғы 15 қыркүйек 22:09
Бөлісіңіз:
Жамбыл облысында биыл 13 инвестициялық жоба іске асырылып жатыр

ТАРАЗ. ҚазАқпарат – Жамбыл облысының әкімі Бердібек Сапарбаевтың төрағалығымен өткен аппараттық кеңесте экспортқа бағытталған инвестициялық жобаларды іске асыру және инвестиция көлемін арттыру мәселелері талқыланды, деп хабарлайды ҚазАқпарат тілшісі.

Ұқсас жаңалықтар
Еліміздің 13 өңірі инвестиция тартуда өсім көрсетті Қазақстандағы шетелдік компаниялар саны 11,8 пайызға өсті

Басқосу Youtube-тегі облыс әкімдігінің арнасы арқылы тікелей эфирде көрсетілді.

Кәсіпкерлік және индустриалды-инновациялық даму басқармасының басшысы Аспандияр Сейсебаев атқарылып жатқан жұмыс барысын баяндады.

Жамбыл облысында индустриялық-инновациялық даму бағдарламасы аясындағы 26 жоба бойынша 6 мыңға жуық жұмыс орнын ашу жоспарланып отыр. Іске асыру мерзімі – 2020-2025 жылдар аралығы. Олардың қатарында химия өнеркәсібі, агроөнеркәсіп кешені, металлургия, фармацевтика, машина жасау салаларындағы жобалар бар.

2019 жылы жалпы сомасы 4,5 млрд теңгеге 4 жоба іске асырылды. Атап айтсақ, «Greenwill» ЖШС аквапоника технологиясы негізінде салат дақылдары мен балық өндірісі жолға қойылып, «Super-pharm» ЖШС бір реттік медициналық мақсаттағы бұйымдарды өндіру зауытының корпусы ашылды, «Қордай сүт өнімі» ЖШС балмұздақ өндіру бойынша жаңа автоматтандырылған желісін енгізсе, ал, «Қордайкорм» ЖШС малға арналған құрама жем өндірісін кеңейтті. Барлығы 350 тұрақты жұмыс орны құрылған.

Биыл жалпы құны 84,9 миллиард теңге 13 инвестициялық жобаны іске асыру жоспарланған.

Бүгінгі күнге дейін «Astana Food Storage» ЖШС ауылшаруашылық паркін ашса, «Wind powercity» ЖШС жел электр стансасы жұмысын бастады. Сондай-ақ, «Азия Сад» ЖШС қарқынды бақшаны іске қосқан.

Жыл соңына дейін 66,1 млрд теңгеге тағы 10 жоба жүзеге асырылмақ.

Бердібек Сапарбаев жобалар келесі жылға қалмас үшін барлық жағдайды алдын-ала ескеріп, мәселелерді дер кезінде шешуді тапсырды.

Тиісті басқарма 2015-2019 жылдар аралығында жүзеге асырылған 31 жобаны талдап, 11 кәсіпорынның өзінің толық қуаттылығының 50 пайызынан аса алмағанын анықтаған.

«Тараз қаласы мен аудан әкімдіктері шикізатпен, экспортпен қамтамасыз ету мәселелерін шешуге бағытталған Жол картасын әзірлеуі керек. Ол алдағы уақытта кәсіпорындардың толық қуатына шығуына мүмкіндік береді», - деді Аспандияр Сейсебаев.

Спикер әсіресе Жуалы, Меркі, Жамбыл және Т.Рысқұлов ауданында инвестицияларды тарту жұмыстары тиісті деңгейде жүргізілмегендігін атап өтті.

Осы тұрғыда туындаған сұрақтарға аудан әкімдері мардымсыз жауаптар қайырды. Олардың айтуынша, жобалар жоқ емес, дегенмен олар әзірге тек талқылау сатысында екен.

«Аудандарда мүмкіндіктер өте көп, бірақ әкімдер кабинеттерінде отырып алып, инвесторлардың өздері келуін күтеді. Олар тіпті облыс әкімдігінің басқармаларымен, кәсіпкерлік нысандарымен бірлесіп жұмыс жасау туралы ойға да алмайды. Егер сіздер өз міндеттеріңізге жауапкершілікпен қарасаңыздар, онда ауылшаруашылығы саласында көптеген бірегей жобаларды жүзеге асыруға болар еді. Мысалы, Жуалы ауданында картоп талайдан бері өсіріліп келеді. Бірақ егін алқаптары мен өнім көлемін ұлғайтуға, техникамен қамтуға көмектесу қажет.

Көкөністер мен жемістермен қамтамасыз ету мәселесін шешуге болады. Баламалы энергия көздерін пайдалана отырып, бизнесті дамытуға мүмкіндік жеткілікті. Әкімдер бұл туралы ойласып, әлеуетті инвесторларды тарту, мемлекеттік бағдарламалар шеңберінде бизнес-жобаларды қолдау бойынша жұмыстар жүргізу керек», - деді аймақ басшысы.

Жиынды қорытындылай келе, Бердібек Сапарбаев жауапты тұлғаларға жылыту маусымы мен коронавирус пандемиясының екінші толқынына дайындық, қашықтықтан оқыту сапасын арттыру бойынша нақты тапсырмалар жүктеді.


Біздің каналымызға жазылыңыз:

Бөлісіңіз:

Автор:

Сая Сембай

Загрузка...
Пікір қалдыру
+7
Жіберу
Сондай-ақ... оқыңыз
Загрузка...
ONLAIN QYZMETKERLER
REDAKTOR
Кожакелдиев Е.
Кожакелдиев Е.
954-059
REDAKTOR
Гүлмира Алякпарова
Гүлмира Алякпарова
954-059
REDAKTOR
Ербол Жанат
Ербол Жанат
954-059

MURAǴAT