Жамбыл облысы Арысты қалпына келтіру бойынша өз жұмыстарын аяқтады
Бүгін Арыс қаласында Жамбыл облысына бөлінген 3-сектордағы құрылыс жұмыстарының аяқталуына орай салтанатты шара өтті. Оған жергілікті тұрғындармен бірге жұмыс жүргізген бірқатар құрылысшылар қатысты.
«Жиынды Түркістан облысы әкімінің бірінші орынбасары Қосман Айтмухаметов сөз сөйлеп, ашты. Облыстан арнайы ат басын бұрған бір топ жамбылдықты аймақ басшысының орынбасары Еркебұлан Дауылбаев бастап келді. Еркебұлан Әбілханұлы өзінің алғысөзінде Жамбыл облысы штабының қарқынды жұмысы, арыстықтардың белсенділігі мен ықыласы туралы айрықша айтып өтті. Сондай-ақ, қалада орын алған төтенше жағдайдың зардаптарын жоюға жұмыла атсалысқан көпшілікке алғысын білдіріп, мұндай оқыс оқиға енді елімізде орын алмауын тіледі. Сондай-ақ Түркістан облысы әкімінің кеңесшісі Ұласбек Сәдібек, Жамбыл облыстық мәслихатының хатшысы Бағлан Қарашолақов, Арыс қаласының әкімі Мұрат Болатұлы Қадырбекке және тағы басқа құрметті қонақтар жамбылдық құрылысшылардың табанды жұмысын, елеулі еңбегін тілге тиек етті»,-делінген облыс әкімдігі таратқан ақпаратта.
Салттанатты жиын «Арысты тербеткен Әулиеата әуендері» атты К.Әзірбаев атындағы Жамбыл облыстық филармониясының концерттік бағдарламасына ұласты. Оның барысында Арысқа арнау айтылып, әсем әндер мен биден шашу шашылды.
Бұдан бөлек, аянбай тер төккен, штаб жұмысының басы-қасында жүрген бір топ азамат пен құрылысшылар марапатталды.
Шара аясында 4 үй салтанатты түрде пайдалануға берілді. Ол үйлердің екеуі толығымен қайта салынса, екеуі толық жаңғыртылды. Құрылысын жүргізген мердігер компания аталған үй иелеріне өз сый-сияпаттарын жасады.
Айта кетейік, Арыс қаласындағы Жамбыл облысының штабына қарасты 3-секторға 11 көше бекітілген. Онда 312 жеке тұрғын үйлермен бірге 14 әлеуметтік және коммерциялық нысан бары анықталған болатын. Зерделеуден өткен жеке тұрғын үйдің барлығының ақау актілері толтырылып, сметалау жұмыстары жасалды. Нәтижесінде қираған 4 үйдің екеуі жаңадан тұрғызылып, екеуі толық жаңғыртылды. Қалған 309 үйге әртүрлі жөндеу жұмыстары жүргізіліп, қалпына келтірілді. Бұл жұмыстарға 4 мердігер компания, 500-ден аса құрылысшы тартылды.Тиісті шығындар республикалық бюджет пен арнайы қорға жинақталған қаржыдан қарастырылды.
Әулиеаталықтар арыстық ағайындарға бұдан өзге де түрлі қолдаулар көрсеткенін бұдан бұрын да хабарлағанбыз. Атап айтар болсақ, ондағы зардап шеккен азаматтарға көмек көрсету бойынша «Арыс. Біз біргеміз!» республикалық акциясы аясында Тараз қаласында 4 қабылдау пункті ашылды. Нұр Отан партиясының облыстық және аудандық филиалдарындағы арнайы пункттерде жиналған көмек материалдары, азық-түлік пен бірінші қажеттіліктегі заттар Арысқа жеткізілді. Барлығы 400 тоннадан астам гуманитарлық көмек, азық-түлік, тұрмысқа қажетті бұйымдар жөнелтілген. Ол ғана емес, тұрғындарға медициналық көмек көрсету үшін 2,2 миллион теңгеге қажетті дәрі-дәрмегімен қамтылған арнайы жасақталған 4 реанимобильмен 8 фельдшер Арыс қаласына жіберілді. Сондай-ақ, Арыс қаласының 400-ге жуық баласы Жамбыл облысындағы жазғы сауықтыру Тау самалы, Жұрындысай, Жұлдыз сынды лагерлерінде демалды.
