Жамбыл облысы әкімдігінде көктемгі су тасқынының алдын алу шаралары талқыланды

ТАРАЗ. ҚазАқпарат – Жамбыл облысы әкімдігінде өткен жиында төтенше жағдайлар департаментінің басшысы Бағдат Данилов өңірдің көктемгі су тасқынының алдын-алу шараларына дайындық барысы туралы баяндады, - деп хабарлайды ҚазАқпарат облыс әкімінің баспасөз қызметіне сілтеме жасап.

Облыс тұрғындары үшін су тасқыны Шу, Талас және Аса өзендерінен, сондай-ақ 14 су қоймасында болуы мүмкін. Су басуды болдырмау мақсатында кешенді іс-шаралар жүргізілен.

Департамент басшысының айтуынша, 142 шақырымдық кәріз құбырлары және су арналары, 185 шақырым арық желісі, 430 теміржол және автомобиль жолдарындағы көпір, сондай-ақ 1790 су өткізу торабы тазартылған. «Көктем» командалық штабтық оқу-жаттығуы барысында азаматтық қорғаныс күштері мен құралдары толық дайындыққа келтірілді.

Облыс әкімі Бердібек Сапарбаев ТЖ қызметін жергілікті атқарушы органдармен бірлесе отырып алдын алу шараларын жалғастыруға шақырды.

«Ауа райы күтпеген жерден өзгеруі мүмкін. Сондықтан біз бәріне дайын болуымыз керек», - деді ол.