Жамбыл Ахметбековтің штаб өкілдері Қызылордада еңбек ұжымымен кездесті

НҰР-СҰЛТАН. ҚазАқпарат - Қазақстан коммунистік халық партиясы атынан ҚР Президенттігіне кандидат Жамбыл Ахметбековтің Қызылорда облыстық сайлауалды штабы өкілдері қалалық автобус паркінің еңбек ұжымымен кездесті.

ҚКХП Қызылорда облыстық сайлауалды штабының жетекшісі Т.Телеубаев жиналғандарға партияның сайлауалды тұғырнамасын таныстырды.

Ол марксистік-лениндік ұстанымдардың маңызды тұстарын тілге тиек етіп, коммунистік тәрбиенің тәжірибелік аспектілері мен коммунистердің батыстың кері құндылықтарына қарсы жүргізіп жатқан жұмыстарына тоқталды.

Сондай-ақ, ол сайлаушыларды 9 маусым күні өтетін кезектен тыс Президент сайлауында белсенді болуға және азаматтық борыштарын орындауға шақырды.

Еске сала кетейік, ҚР Президентінің сайлауы 9 маусым күні өтеді. Сайлауға 7 кандидат тіркелді.