#Жақсылық жаса: Мүгедек жанға қолғабыс еткен автобус жүргізушісі танымал болды
Әлеуметтік желіде таралған ақпаратта №115 автобус жүргізушісі аялдамада күтіп тұрған арбадағы жолаушыны көтеріп кіргізіп, арнайы орынға отырғызған. Аялдамаға жеткен соң ол көлікті тоқтатып, мүмкіндігі шектеулі жолаушыны өзі түсіріп жіберген.
Оның бұл әрекеті көпшіліктің ризашылығын туғызды. Көп адам бұл процесті видеоға түсіріп алып, арнайы пабликтерге жариялап жіберді.
Ербол Омаров 19 жылдан бері көлік жүргізіп келеді. Соңғы рет ол қалалық №115 автобусты тізгіндеген.
Оның әкесінің де мамандығы жүргізуші екен.
«Үлкен автобустар, қозғалтқыштар, техника мені бұрыннан қызықтырады. Балық аулағанды ұнатамын. Мұқтаж адамға көмектесу әр адамның міндеті деп ойлаймын», - деді Е.Омаров.
«Жүргізуші аялдамада автобус күтіп тұрған мүмкіндігі шектеулі адамға көмектескен. Автобустан түсіп, жолаушыны салонға кіргізіп, арнайы орынға отырғызған. Барлық талап етілетін қызметін орындаған. Бірақ, ол өзінің танымал болып кеткеніне ыңғайсыз болып жүр. Оның орнында кез-келген жүргізуші осылай етер еді деп ойлаймыз», - деді «Алматыэлектротранс» компаниясын өкілдері.
Жұмыс берушінің айтуынша, Ербол қызмет барысында бір де бір ескерту алмаған.