Зейнетақы жинағын алу: Ең қымбат баспана - 160 миллионға, ең арзаны - 1 миллионға сатылған

НҰР-СҰЛТАН. ҚазАқпарат – «Отбасы банк» АҚ басқарма төрағасы Ләззат Ибрагимова зейнетақы жинағын пайдалану арқылы тұрғын үй сатып алудағы ең қымбат және ең арзан келісімшартты атады, деп хабарлайды ҚазАқпарат тілшісі.

Банк төрағасының айтуынша, 2021 жылы сату және сатып алу мәмілелерінің саны өткен жылмен салыстырғанда көбірек.

«179 192 мәміле ипотекасыз жасалды, яғни, бұлар - баспананы толығымен сатып алғандар. Мұнда зейнетақы жинағын пайдалану арқылы ең ірі сома – 162 млн 400 мың теңгеге премиум санаттағы тұрғын үй алынған. Ең төмен мәміле құны – миллион теңгеге жуық. Бәлкім бұл ауылдық жерде немесе аудан орталығында тіркелген шығар», - деді Ләззат Ибрагимова Орталық коммуникациялар қызметінде өткен баспасөз мәслихатында.

Айта кетейік, ҚР Президенті Қасым-Жомарт Тоқаев Үкіметке зейнетақы қорындағы қаражатты пайдалануға қатысты шекті межені көтеру мерзімін 2022 жылдың 1 сәуіріне дейін ұзартуды тапсырды.

Сондай-ақ зейнетақы жинағын банктегі депозитке аударған соң үш жыл ішінде тұрғын үй заемын рәсімдеу қажет.