Зейнетақы салымшыларының жинағы 2 трлн теңгеге өсті

АЛМАТЫ. ҚазАқпарат–Жыл басынан бері БЖЗҚ салымшыларының зейнетақы жинақтары 2 трлн теңгеге артты, деп хабарлайды ҚазАқпарат тілшісі.

2020 жылдың 1 желтоқсанында Бірыңғай жинақтаушы зейнетақы қоры салымшыларының шоттарында 12,7 триллион теңге сомасында зейнетақы жинақтары қалыптасты. Жыл басынан бері 1,9 трлн теңгеге немесе 18%-ға артты.

Зейнетақы жинақтарының негізгі сомасы міндетті зейнетақы жарналары (МЗЖ) есебінен жинақталды, оның мөлшері 12,4 трлн теңге.

2020 жылдың 1 қаңтарынан бастап 1 желтоқсанға дейінгі кезең ішінде БЖЗҚ салымшыларының шоттарына 1,13 трлн теңге таза инвестициялық табыс есептелді. Бұл 2019 жылдың сәйкес кезеңімен салыстырғанда 531 млрд теңгеге (өсім 88%) артық.

Жеке зейнетақы шоттарының саны 2020 жылдың 1 желтоқсанында 11,6 млн бірлікті құрады.

2020 жылдың басынан бері салымшылардың шоттарына жалпы көлемі 958,8 млрд теңге зейнетақы жарналары аударылған, ол 2019 жылдың 11 айындағы көрсеткіштен 75,8 млрд теңгеге немесе 9% асып түсті.