Ыстанбұлда түркі мемлекеттерінің БАҚ саласындағы ынтымақтастығы талқыланады
2022 жылғы 14 мамыр 12:35

Ыстанбұлда түркі мемлекеттерінің БАҚ саласындағы ынтымақтастығы талқыланады

ЫСТАНБҰЛ. ҚазАқпарат - Бүгін Ыстанбұлда Түркі мемлекеттері ұйымына мүше елдердің ақпарат және БАҚ-қа жауапты министрлері мен жоғары лауазымды тұлғаларының төртінші отырысы өтеді. Бұл туралы ҚазАқпарат «Anadolu» ақпарат агенттігіне сілтеме жасап хабарлайды.

Шараны Түркия президенті әкімшілігінің байланыс бөлімі ұйымдастырып отыр. Мақсат – түркі мемлекеттері арасында БАҚ және коммуникация саласындағы ынтымақтастықты дамыту. Күн тәртібінде аталған салалардағы бірлескен зерттеулер мен жобалар қаралмақ.

Түркия президенті Режеп Тайып Ердоған жиын қатысушыларына бейнеүндеу жолдайды деп жоспарланған.

Кездесуге Түркі мемлекеттері ұйымының Бас хатшысы Бағдад Әміреев, Түркия президенті әкімшілігі байланыс кеңсесінің меңгерушісі Фахреттин Алтун, Әзербайжан президентінің көмекшісі Хикмет Гаджиев қатысады.

Сонымен қатар, отырысқа ҚР Ақпарат және қоғамдық даму министрі Асқар Омаров, Венгрия Сыртқы істер және сауда министрлігінің қауіпсіздік саясаты жөніндегі мемлекеттік хатшысы Петер Штарай, Өзбекстан президенті әкімшілігі жанындағы Ақпарат және бұқаралық коммуникациялар агенттігінің директоры Асаджон Ходжаев, Қырғызстан Мәдениет, ақпарат, спорт және жастар саясаты министрлігі жанындағы Ақпарат және бұқаралық коммуникациялар департаментінің директоры Салқын Сарногоева, Түрікменстанның Анкарадағы елшісі Ишанкули Аманлыев қатысады.

Іс-шараға ресми делегациялардан бөлек, түркі әлемінің БАҚ және коммуникация институттарының басшылары, сарапшылар, өнер қайраткерлері, ғалымдар мен коммуникация факультеттерінің студенттері де қатысады.

Қатысушылар цифрлық технологиямен жабдықталған стендтер мен фойеде Түркі мемлекеттері ұйымына қатысушы және бақылаушы елдердің бұқаралық ақпарат құралдары мен байланыс мекемелерінің қызметі туралы ақпарат ала алады.

Еске салсақ, Орталық Азия елдерінде қазақстандық ЖОО филиалдары ашылуы мүмкін.


Ұқсас жаңалықтар
Қазақстанның велоспорт құрамасы Түркияда 4 медаль жеңіп алды
2022 жылғы 7 тамыз 13:56

Қазақстанның велоспорт құрамасы Түркияда 4 медаль жеңіп алды

АНКАРА. ҚазАқпарат – Түркия елінде өтіп жатқан Ислам ынтымақтастығы ойындарының кезекті жарыс күнінде қазақстандық велоспорт құрамасы төрт медаль жеңіп алды, деп хабарлайды ҚазАқпарат Ұлттық олимпиада комитетіне сілтеме жасап.

Ерлер арасындағы жеке жарыста Әлішер Жұмақан жеңіс тұғырына көтерілді. Оның әріптесі Дмитрий Носков мәреге екінші келді.

Дәл осы сайыс түрінен әйелдер арасында Рината Сұлтанова бірінші орын иеленген. Ал тағы бір қазақстандық Марина Кузьмина қола жүлде жеңіп алды.


Фото: olympic.kz




Қытайда жаңа терминдерді қазақшаға аудару мәселесі көтерілді - Шетелдегі қазақ тілді БАҚ-қа шолу
2022 жылғы 7 тамыз 13:41

Қытайда жаңа терминдерді қазақшаға аудару мәселесі көтерілді - Шетелдегі қазақ тілді БАҚ-қа шолу

НҰР-СҰЛТАН. ҚазАқпарат - «ҚазАқпарат» ХАА әдеттегідей шетелдегі қазақ тілінде тарайтын ақпарат көздеріне апталық шолуын ұсынады.

Ректор Түркияда екі халықаралық ұйым басшысымен кездесті - TRT

Қожа Ахмет Ясауи атындағы Халықаралық Түрік-Қазақ университетінің ректоры Жанар Темірбекова Түріксойға барып, бас хатшы Сұлтан Раевпен кездесті.

Бас хатшы кеңсесінде өткен кездесуде тараптар қыркүйек айында Түркістан қаласында «Алтын көпір» жобасы аясында ұйымдастырылатын Қырғыз-Түркия Манас университетінің күндеріне дайындық жұмыстары мен қазан айында өтетін Ясауи университетінің 30 жылдық мерейтойына арналған шараларды кеңінен талқылады, деп хабарлайды Түркия радио теледидар агенттігі.

Кездесу барысында Жанар Темірбекова Түріксой бас хатшысы Раевты университеттің 30 жылдық мерейтойына шақырды.

Сондай-ақ осы сапарында Қожа Ахмет Ясауи атындағы Халықаралық Түрік-Қазақ университетінің ректоры Жанар Темірбекова Түркия республикасының Шетелдегі түріктер және ағайын қауымдастықтар басқармасының басшысы Абдулла Эренмен кездескені туралы түркиялық БАҚ жазды.

Бұл кездесу барысында ректор Жанар Темірбекова Абдулла Эрен мырзаға Ахмет Ясауи университетінің «Еуразия» жазғы мектебін ұйымдастыруда көрсеткен көмегі үшін алғысын білдірген.

Айта кетейік, биылғы жылы Өкілетті кеңес басқармасы мен оқу ордасы ұйымдастырған «Еуразия» жазғы мектебінің алғашқы 70 студенттен тұратын тобы Түркия еліне аттанған болатын. Онда 20 күндік бағдарлама аясында түрлі сала бойынша оқу семинарлары мен кездесулер өтеді деп жоспарланған. Сонымен қатар студенттер Түркия елінің Ыстанбұл, Анкара, Бурса және Кония қалаларының бай тарихи және мәдени мұраларымен танысады.

Қазақстан өндірсін арттыруға ниетті - Parstoday

Қазақстанның Энергетика министрі өз елінің OPEC+-те мұнай өндірісін арттырып, оның бағасын түсіруге ниетті екенін хабарлады.

Бұл туралы осы аптада Иранның «Parstoday» ақпараттық агенттігі де хабарлады.

Ирандық БАҚ Қазақстанның Энергетика министрі Болат Ақшолақовтың мұнай бағасы туралы пікірін жазған.

Айта кетейік, Қазақстанның Энергетика министрі «Қазақстан 1 баррель мұнайдың бағасы 60-80 доллардың арасы болғанын қалайды. Жаһандық нарықта мұнай бағасын түсіру үшін оны өндіру көлемін арттыруға мәжбүрміз», деген болатын.

«OPEC+-тегі хабардар адамдар осы топтың мұнай өндірісіне қатысты саясатының өзгеру ықтималын жоққа шығармады», деп түйіндейді бұл жазбаны Иранның «Parstoday» ақпараттық агенттігі.

Жаңа терминдерді қазақшаға аударуға байланысты жиналыс өтті - CNR

Қытайдың Бейжіңдегі Ұлттар аударма мекемесінің 2022 жылғы жаңа терминдерді қазақшаға аударып бекітуге арналған мамандар жиналысы Шыңжаңның Алтай аймағы Буыршын ауданында өтті.

Қытайдың Ұлттар аударма мекемесінің бастамасымен Буыршын аудандық халық үкіметі ұйымдастырған Қытай Ұлттар аударма мекемесінің 2022 жылғы жаңа атауларды(терминдерді) қазақшаға аударып бекіту мамандар жиналысы 4 тамыз күні ашылды, деп хабарлайды Қытайдың CNR басылымы.

Қытайлық БАҚ-тың келтірген дерегіне сүйенсек, аталған ғылыми басқосуға Бейжіңдегі Орталық радио телевизия бас станциясы, Орталық ұлттар аударма мекемесі, Орталық Ұлттар баспасы қатарлы мемлекеттің орындардан және Шыңжаңдағы баспасөзбен оқу-білім саласынан келген 30-дан астам тіл және аударма мамандары қатынасты. Олар бұл жиналыста жаңа терминдерді аудару мәселелерін талқылап, кең көлемде пікір алмастырды.

Орталық ұлттар аударма мекемесі парткомның төрағасы, мекеме бастығы Лан Жычи, Алтай аймақтық парткомның тұрақты мүшесі, Үгіт бөлімінің бастығы Лан Шыңшин, Буыршын ауданының әкімі Нұрбек Разбекұлы қатарлы басшылар Буыршында өткен ғылыми жиынның ашылу салтанатына қатынасты.

Айта кетейік, бұл жиналысты Орталық Ұлттар аударма мекемесінің орынбасар бастығы Бауыржан Нұрмолдаұлы басқарды.

Аталған жиналысқа қатысқан Орталық аударма мекемесі парткомның төрағасы Лан Жычи атау-терминдерді аударудың маңыздылығына тоқталды. Оның айтуынша, тіл, жазу істері - қоғамдық, жалпы бұқаралық сипат алатын маңызды саланың бірі. Аударма қызметін ойдағыдай істеу Қытайдағы аз санды ұлттар үшін өте маңызды. Сәтті аударылған атаулар мен терминдер арқылы қарапайым халық заң-ережелерді дұрыс түсіне алады. Алдағы уақытта жаңа терминдерді дұрыс аударып, ұлттық аударма қызметінің маңыздылығын арттыру керек. Сол арқылы әр ұлт өкілдерінің мемлекеттік, тарихи, ұлттық көзқарасы және мәдениет, діни ұстанымын дұрыс орнатуына жетекшілік етуге болады.

Осы жолғы терминдерді қазақшаға аударуға байланысты жиналыс мемлекеттің ұлт қызметі саясатын дұрыс жүргізудегі нақты шараларының бірі. Бұл ғылыми конференция жаңа атау терминдерді аударуды ғылыми өлшемге түсіріп, елдегі қазақ тілі аударма істерінің дамуы жөнінен белсенді роль атқарады деп қортындылайды қытайлық БАҚ.

Қазақстанда халық саны артты - Parstoday

Қазақстан халқының саны 2022 жылдың бірінші жартысында 124000 адамға артты.

Халық саны ағымдағы жылдың 1 шілдесіне дейін 19 млн 246 мың адамға жетті. Яғни, жыл басынан бері 124 мың адамға артты.

Бұл туралы осы аптада Parstoday ақпарат агенттігі Қазақстанның Ұлттық статистика агенттігі сілтеме жасап хабарлапты.

Ирандық БАҚ-тың келтірген дерегіне сүйенсек, Қазақстан халқының саны ағымдағы жылдың бірінші жартысында 0,65 пайызға өскен. Тұрғындар саны бәрінен бұрын ел астанасы Нұр-Сұлтанда артқан. Нұр-Сұлтан қаласының тұрғындар саны 2022 жылдың 1 шілдесінде 1267005 адамға, Алматыда 2053009 адамға, Шымкентте 1127003 адамға жетті.

Баян-Өлгий аймағының футбол командасы Моңғолия чемпионы атанды - Kaznews

Футболдан Моңғолия президенті бастамасымен өтіп жатқан 21 аймақ арасындағы ел чемпионатының 1-лига ойындарының жартылай финалында Баян-Өлгий аймағының командасы Сэлэнгэ аймағының командасын 4:1 есебімен ұтып, алғаш рет финалға жолдама алды, деп хабарлайды моңғолиялық Kaznews ақпарат агенттігі.

Моңғолиялық БАҚ-тың келтірген дерегіне сүйенсек, матчтың 28 минутында Д. Нуршәрифтің пеналтиден соққан добы қарсылас команданың қақпасына тоғытылды. Сондай-ақ, команда капитаны Б.Мустафа 54 және 72 минутта, Д. Нуршәриф 69 минутта гол соқты.


Сэлэнгэ аймағының спортшысы Э.Дашдаваа қарымта шабуылда ойынның 64 минутында 1 гол соққан.

Ал 6 тамыз күні 1-лига ойындарының финалдық кездесуі өтеді деп жоспарланған. Финалда Баян-Өлгийлік аяқдопшылар Төв аймағының командасымен сайысқа түсетіні айтылған болатын.

Бүгін моңғолиялық қандасымыз Өмірбек Қабай facebook-тегі парақшасында Баян-Өлгий аймағы құрама командасының Моңғолия чемпионы болғаны туралы хабарлаған.

«Баян-Өлгий аймағының құрама командасы футболдан Моңғолия чемпионы атанды. Финалда 2:1 есебімен Төв аймағының командасынан басым түсті. 2023 жылы жоғарғы лигада өнер көрсететін болады», деп жазды Ө. Қабай.


Kazakh TV ел аумағында көрсетілуге міндетті телеарналар тізіміне енді
2022 жылғы 4 тамыз 18:24

Kazakh TV ел аумағында көрсетілуге міндетті телеарналар тізіміне енді

НҰР-СҰЛТАН. ҚазАқпарат – Kazakh TV Қазақстанның барлық аумағында трансляциялауға міндетті телеарналар тізіміне енді. ҚР Ақпарат және қоғамдық даму министрінің бұйрығына тиісті өзгерістер енгізілді, деп хабарлайды ҚазАқпарат тілшісі.

Бұйрыққа сәйкес, енді міндетті телерадиоарналардың тізімі мынадай:

1. «QAZAQSTAN»

2. «Хабар»

3. «Хабар 24»

4. «BALAPAN»

5. «ABAI TV»

6. «QAZSPORT»

7. «Kazakh TV»

8. «МИР»

9. «Астана»

10. «Almaty»

11. «Евразия бірінші арнасы»

12. «КТК»

13. «31 арна»

14. «Жетінші арна»

15. «El arna»

Kazakh TV арнасы Қазақстанның барлық аймақтарында хабар тарата бастайды. Республикадан тыс жерде хабар тарату әлемнің 120-дан астам елінде жалғасады.

Kazakh TV – Қазақстан Республикасының тұңғыш ұлттық спутниктік телеарнасы. Қазіргі уақытта ол «Қазақстан Республикасы Президентінің Телерадиокешені» КЕАҚ құрылымына кіреді.

Арна мазмұны – 100% отандық өнім. Жалпы аудиториясы – 300 миллионнан астам көрермен. Телеарнаның бағдарламалары бірнеше тақырыптық бағытта ұсынылады және Қазақстанның мәдениеті, дәстүрі, тарихы, туризмі мен инвестициялық мүмкіндіктері сынды салаларды қамтиды.

Телеарна 2002 жылы 25 қазанда Caspionet деген атпен эфирге шыға бастады. Ел имиджін көтеруге бет бұрған арна 2012 жылдың 1 қыркүйегінде Kazakh TV болып өзгертілді. 2017 жылдың 16 қарашасында Kazakh TV телеарнасы жаңа форматқа – қазақ, орыс және ағылшын тілдеріндегі дыбысты көп арналы хабар таратуға көшті.

2018 жылдың 1 мамырынан бастап қолданыстағы үш тілге төртіншісі – қырғыз тілі қосылды. 2018 жылдың 28 қарашасында арна өзбек тілінде хабар тарата бастады. Көп арналы сигнал сандық теледидардың әр абонентіне аталған тілдердің әрқайсысында 100% таратылатын аудио тректі таңдауға мүмкіндік береді.



Jańalyqtar

Үрдіс

MURAǴAT