Вайнерлер ісі: Прокурор белгілі вайнерлерді бес жылға бас бостандығынан айыруды сұрады
Сот отырысы онлайн форматта өтті. Оған 12 айыпталушы қатысты. Олар Қылмыстық кодекстің екі бабы: 217-бабы ( 3 – бөлігі, 1 және 2 – тармақшасы) «қаржы пирамидасын құру және басқару» және 262-бабы (1 және 2 бөліктері) - «ұйымдасқан топты, қылмыстық ұйымды құру және басқару» бойынша айыпталуда. Прокурор олардың әрқайсысына 6 жылдан 15 жылға дейін бас бостандығынан айыруды сұрады.
Мейіржан Төребаев пен Мейірхан Шерниязовқа 217-бап ( 3-бөлігі, 2-тармақшасы) бойынша бес жылға бас бостандығынан және жеті жылға бизнеспен айналысу құқығынан айыруды сұрады. Сондай-ақ, олар жазаны ең төменгі қауіпсіздік мекемесінде өтеуі керек екенін айтты.
Тергеу барысында 262-бап (2-бөлік) және 217-бап ( 3-бөлігі, 1-тармақшасы) бойынша вайнерлердің кінәсі дәлелденбеді, сондықтан прокурор олардың айыптарын алып тастауды сұрады.
Жәбірленушілер прокурор сұраған жазаларды әртүрлі қабылдады. Кейбірі қанағаттанса, кейбірі жазаны жеңіл деп санады. Жәбірленушілер сондай-ақ Шыңғыс Құрманғалиевті, Ораз Әділет пен Әзімжан Саидбаевты қылмыстық жауапқа тартуды талап етті.
Соттың жалғасы 14 маусым күні болады.
Еске салайық, өткен жылдың ақпан айында танымал вайнерлер Мейіржан Төребаев, Азимжан Саидбаев және Мейірхан Шерниязов қаржы пирамидасын құрды деген күдікпен ұсталған болатын
Қаржы пирамидасын құрды деген күдікке ілінген вайнер Азимжан Саидбаевқа іздеу жарияланған.
Өткен жылдың желтоқсан айында қаржы пирамидасын құрды деп айыпталған вайнерлердің ісі сотқа жолданған болатын
Сондай-ақ соттың шешімімен Мейіржан Төребаев тергеу абақтысынан үйқамаққа ауыстырылған болатын