Вакцина алып жатқан балалардың ата-анасын қандай сұрақтар жиі мазалайды
2021 жылғы 26 желтоқсан 17:00

Вакцина алып жатқан балалардың ата-анасын қандай сұрақтар жиі мазалайды

НҰР-СҰЛТАН. ҚазАқпарат – Бүгінде 12 жасқа толған қазақстандық жасөспірімдер COVID-19-ға қарсы вакцина алып жатыр. Басты талаптың бірі – ата-ананың рұқсаты.

Осы орайда ҚазАқпарат тілшісі балалар вакцинасының маңыздылығы туралы елордадағы №1 қалалық емхананың балалар және әйелдерді емдеу бөлімінің басшысы Жамиля Танлашевамен әңгімелескен еді.

«Біздің емханадан вакцинаны көбіне 16-17 жастағы жоғары сынып оқушылары алып жатыр. Олар ата-анасымен келеді және бізден кеңес сұрап жатады. Ата-аналардың жиі қоятын сұрағы, екпенің кері әсері қандай, вакцина қанша уақытқа дейін баланы коронавирустан қорғай алады және екпе ғылыми зерттеуден өткен бе деген сауалды көп қояды. Әрине біздің мамандар ата-аналар мен жасөспірімдердің сұрағына жауап беріп жатыр. Осы уақытқа дейін балалар арасында екпе алып кері әсері байқалған жағдай тіркелген емес. Әзірге дәрігердің көмегіне ешкім жүгінген жоқ», - деді Жамиля Танлашева.

Оның айтуынша, бүгінде аталған емханада вакцина алу процесі қарқынды жүріп жатыр.

«Балалардың індетке қарсы екпені алғаны жөн. Осы орайда ата-аналарды дұрыс түсінуге және баласына вакцина салдыруға кеңес береміз. Біздің балалар алып жатқан АҚШ-тың Pfizer вакцинасын әлемнің көптеген елдері қолданып жатыр және ол ғылыми зерттеу мен сынақтан өткен. Сондықтан ата-аналар уайымдап, қорықпау керек. Біз балаларымызды індеттен вакцина арқылы ғана қорғай аламыз», - дейді ол.

Дәрігердің мәлімдеуінше, вакцинаға қатысты жалған ақпарат пен түрлі қауесет кейде қоғамда түсінікпеушілік туғызып жатады.

«Вакцина алғаннан кейін ерекше жағдайда күтінудің қажеті жоқ. Дегенмен 3 күн бойы дәрігердің бақылауында болған жөн. Немесе бала өзін жайсыз сезінсе, дәрігерге жүгінген абзал. Иә, баланың мазасы кетіп, ыстығы көтерілуі мүмкін. Бірақ бұл қалыпты жағдай, одан шошынбау керек», - деді балалар және әйелдерді емдеу бөлімінің басшысы.

Сондай-ақ, маман аллергиясы бар және 12 жасқа толмаған балаларға екпе алуға болмайтынын айтты.

«Одан бөлек, созылмалы аурудың асқыну жағдайында, вакцина алатын уақытта ыстығы жоғары болса немесе инфекциямен ауырып тұрса вакцина салуға тыйым салынады. Сол сияқты вакцина алатын баланың иммундық жүйесінің қалыпты болуы да маңызды», - деді Ж. Танлашева.


Ұқсас жаңалықтар
Автор:
Тілші

Jańalyqtar

MURAǴAT