Үйді басқарудың жаңа формасы тұрғындар үшін қаншалықты тиімді

Автор:  
Алма Мұқанова

Үйді басқарудың жаңа формасы тұрғындар үшін қаншалықты тиімді

АЛМАТЫ. ҚазАқпарат - Алматыда 600 мүлік иелерінің бірлестігі тіркелді және 2182 жай серіктестік таңдалды. Бұл туралы Алматы қаласының Тұрғын үй саясаты басқармасы басшысының орынбасары Нұрбол Қажин Өңірлік коммуникациялар қызметінде өткен брифингте айтты, деп хабарлайды ҚазАқпарат тілшісі.

«Бүгінгі күні Алматы қаласы бойынша 2975 көппәтерлі тұрғын үйді қамтитын 2782 жаңа басқару нысаны тіркелді. Бұл тұрғын үй қорының жалпы санының 39%-ы ғана. Айта кетсек, бірнеше көпқабатты үйдің тұрғындары көбінесе бір МИБ-ті немесе ЖС-ті тіркейді «Долина роз», «Керемет», «Премьера» және басқа да тұрғын үй кешендері осындай қағидатқа негізделген», – деді Нұрбол Қажин.

Оның айтуынша, МИБ пен ЖС-ке көшкен үй тұрғындары тұрғын үй қорын күтіп-ұстауға жұмсалатын шығындардың қандай екенін көре алады. Яғни үйлерді басқарудың жаңа формаларына көшіру өте орынды, өйткені тұрғын үй-коммуналдық шаруашылық реформасы үйлерді күтіп-ұстау сапасын арттыруға мүмкіндік береді, себебі мұны тұрғындардың өздері жасайды.

«Алматы қаласында еліміздегі ең ірі тұрғын үй қоры бар, оның 820-дан астам басқару органдарына қызмет көрсететін 8645 көпқабатты тұрғын үй. Бұл МИБ, ЖС, ПИТК. Бүгінгі таңда 50-ге жуық иесіз басқару органдары жойылды. Бұл ретте 7517 көпқабатты тұрғын үй ғана басқарудың жаңа нысандарына көшуге жатады. Қалғандары ескірген деп танылды немесе олардың меншік иелері Қазақстандық Ипотекалық компания, коммуналдық тұрғын үй қоры», – деді ол.

Спикер қала тұрғындары басқарудың жаңа формаларына көшу қарқынын арттыру қажеттігін атап өтті. Әкімдік көпқабатты үйлер тұрғындарының бастамасын қолдауға және мәселені шешуге көмектесуге дайын, ол үшін сегіз мобильді топ құрылып, қалалық жол картасы, сондай-ақ тұрғындар арасында жиналыстар өткізу кестесі бекітілді.

«Аудандар бойынша сегіз мобильді топ құрылды, оларға тұрғын үй инспекциясы мен әкімдіктердің өкілдері кіреді. Олар тұрғындармен және қолданыстағы басқару органдарының басшыларымен түсіндіру жұмыстарын жүргізеді, МИБ және ЖС көшу алгоритмін түсіндіреді. Жыл басынан бері 800 жиналыс өткізілді», – дейді басқарма басшысының орынбасары.

Ол сөз соңында алматылықтарды басқарудың жаңа формаларына белсенді көшуге шақырды.

Еске салсақ, заң талаптарына сәйкес еліміздегі барлық көппәтерлі үйлер 2022 жылдың 1 шілдесіне дейін үйді басқару органын ауыстыруы тиіс. Жұмыс істеп тұрған ПИК-тің орнына «бір үй – бір мүлік иелерінің бірлестігі – бір шот» қағидаты бойынша мүлік иелерінің бірлестіктері (МИБ) немесе жай серіктестіктер құрылуға тиіс.





Серіктестер жаңалықтары