Үскірік аязда алматылықтар сағатына 33,3 млн кВт электр энергиясын тұтынған
«Самұрық Энерго» компаниясының баспасөз қызметінің хабарлауынша, 26 қаңтарда Алматы бойынша электр стансалары максималды көрсеткіш - 1550 МВт электр энергиясын өндірді. Оның 960 МВт-ы «Алматы электр стансаларының» еншісінде.
«Қалада тәліктік тұтыну көрсеткіші сағатына 33,3 млн КВт-қа жетті. Барлық локалды энергия көздері максималды жүктемемен жұмыс жасады. 2013 жылдан бері Алматыдағы электр энергиясын тұтыну 12 %-ға артқан. 5 жыл бұрын жылына 5,8 млрд КВт/сағ болса, былтыр 6,5 млрд кВт/ сағатқа жетті. Жыл сайын тұтыну көрсеткішінің артуына байланысты аймақта жаңа энергия өндіру стансаларын салу қажеттілігі арта түседі», - деді «Самұрық-Энерго» баспасөз қызметінен.
«Алматы Электр стансалары» АҚ мәліметіне сүйенсек, жыл басынан бері электр энергиясының өндірісі 17 %-ға өскен.
Отын қоймаларында 300 мың тонна көмір сақталған. Бұл қор нормасынан 70%-ға артық.
Қазір қаланың энергоқызметінің басшылары мен апатты бригадалар, «Алатау жарық компаниясы» АҚ 92 бригадасы мен 256 маманы күндіз-түні кезекшілік етіп отыр.
Соның арқасында Орбита шағын ауданындағы төтенше жағдай 1-2 сағаттың ішіне қалпына келтірілген болатын.