Үш қазақстандық еркін күрестен Азия чемпионатының финалына шықты

НҰР-СҰЛТАН. ҚазАқпарат – Моңғолияда Азия чемпионаты аясында еркін күрестен жарыстар жалғасуда. Бүгін кілемге 61, 74, 86, 92, 125 келіге дейінгі балуандар шықты, деп хабарлайды ҚазАқпарат Olympic.kz-ке сілтеме жасап.

Бүгін үш қазақстандық финалға жолдама алды. 74 келіге дейінгі салмақта Нұрқожа Қайпанов жартылай финалда қырғыз балуаны Исламбек Орозбековты 15:8 есебімен ұтты. Ақтық бәсекеде Н.Қайпанов ирандық спортшы Йонес Алиакбар Эмамичогаеймен кездеседі.

Финалға жолдаманы Азамат Дәулетбеков те (86 келіге дейін) алды. Ол 1/2 кезеңде қырғызстандық Саяқбай Юсуповты мерзімінен бұрын ұтты – 10:0. Алтын медаль үшін айқаста үндістандық Дипак Пуниямен кездеседі.

125 келіге дейінгі салмақ дәрежесіндегі Әлішер Ерғали да құрлық біріншілігінің «алтынын» сарапқа салады. Жартылай финалда ол оңтүстіккореялық Йехён Чоннан асып түсті – 9:6. Бас жүлде үшін жекпе-жекте Ерғали ирандық Йадоллах Мохаммадказем Мохебимен белдесетін болады.

Сондай-ақ екі жерлесіміз турнирдің қола жүлдесі үшін таласады. Акбар Құрбанов (61 келіге дейін) Әлібек Әлібеговпен (Бахрейн) кездеседі. Ал Әділет Дауланбаев (92 келіге дейін) жапондық Такума Отсуға қарсы шығады.

Финал Нұр-Сұлтан уақытымен 16:00-де басталады.