US Open: Анна Данилина миксте финалға жолдама алды

АСТАНА. ҚазАқпарат – Қазақстандық Анна Данилина аралас жұпта АҚШ ашық чемпионатының финалына шықты, деп хабарлайды ҚазАқпарат тілшісі.

Қазақстандық теннисші финляндиялық Харри Хелиоваарамен бірге жартылай финалда жапониялық Ена Шибахара – хорватиялық Мате Павичпен шеберлік байқасты.

Қазақстандық-финляндиялық жұп сағат жарымға жуық уақытқа созылған матчта 7:6 (7:2), 6:4 есебімен басым түсті. Олар 4 эйспен бірге 9 брейк-пойнттың үшеуін пайдаланды. Қарсылас дуэт 3 эйс, 2 брейкпен (6 брейк-пойнт) шектелді.

А.Данилина – Х.Хелиоваара финалда америкалықтар Джессика Пегула – Остин Крайчекпен бас жүлдені сарапқа салады. Соңғы бәсеке 9 қыркүйекке белгіленген.

Еске сала кетейік, бұдан бұрын Новак Джоковичтің теннистен әлем рекордын орнатқанын жазған болатынбыз.

Сондай-ақ Денис Евсеев Түркияда Ыстанбұл жарысының ширек финалына шықты.

Ал Тимофей Скатов Испанияда Михаил Кукушкинді ұтып, ширек финалға өтті.

Жібек Құламбаева Италиядағы турнирдің ширек финалына жолдама алды.