Универсиада: Қазақстан хоккейшілері көш басына шықты
Қазақстан жастары бірінші кезеңнің өзінде қарсыластар қақпасына бес шайба салып үлгерді. Алдымен 1-минутта Владислав Никулин есеп ашса, арада бір минут өткенде Артур Шетле есепті ұлғайта түсті. Бұдан кейін Ұлыбритания сапынан Джошуа Кук 3-минутта есеп айырмасын қысқартты. Ал 6-минутта біздің құрама сапынан Антон Никрич қанжығасын майлады. Есеп - 3:1.
Келесі голды біздің құрама 14-минутта соқты. Ол Валерий Гуриннің еншісіне жазылды. Қазақстандық Артем Лихотников 15-минутта есепті 5:1-ге жеткізді.
Екінші кезең де біздің құрама басымдығымен өтті.
Артур Шетле - 23, Андрей Яковлев - 25, Аркадий Шестаков 27-минутта қарсыластар қақпашысын қапы қалдырып кетті. Ал Артем Лихотников 29-минуттың бастапқы және аяқ шенінде екі шайба соғып үлгерсе, 30-минутта Антон Некрич есепті 11:1-ге жеткізді. Сондай-ақ, біздің құрамадан Никита Клещенко - 31, Дмитрий Гурков - 34, Артем Лихотников тағы үш шайбаны қақпаға тоғытты. Есеп - 14:1.
Үшінші кезең басталысымен біздің құрама тағы екі шайба соғып үлгерді. Алдымен 41-минутта Артем Никрич, одан кейін 46-минутта Мадияр Ибрайбеков есепті ұлғайта түсті. Есеп - 16:1. Ал 52-минутта біздің құрамадан А.Волгин мергендік танытты.
Кездесуде Қазақстан құрамасы 17:1 есебімен жеңіске жетті.
Айта кетейік, бүгін В тобында тағы екі ойын өтті. Канада Швейцарияны 6:2, Латвия Швецияны 6:3 есебімен жеңді.
Бүгінгі жеңістен кейін Қазақстан құрамасы 9 ұпаймен көш бастады. Дәл осындай ұпайы бар Канада екінші орында тұрса, одан кейінгі Швейцария мен Латвияның еншісінде алты-алтыдан ұпай бар. Ал Швеция мен Ұлыбритания әзірге бірде-бір ұпай алған жоқ.
Біздің құрама енді 8 наурызда Швейцариямен, 10 наурызда Канадамен шеберлік байқасады.
Қазақстан хоккейшілері бүгінге дейін Латвияны 10:1 есебімен ойсырата жеңіп, одан кейін Швециядан 5:1 есебімен басым түсті.
Сондай-ақ, кеше А тобында да ойындар өткізілді. Атап айтқанда, Ресей АҚШ-ты - 3:2, Словакия Жапонияны - 8:3, Чехия Венгрияны 7:0 есебімен жеңді.
Фото: vk.com/kazakhstanhockey