Үндістанның он бесінші президенті ант қабылдады

НЬЮ-ДЕЛИ. ТАСС – ҚазАқпарат - Драупади Мурму дүйсенбі күні ант беріп, ресми түрде Үндістанның 15-ші президенті болып сайланды. Үндістан телеарналары тікелей эфирде көрсеткен салтанатты шара Нью-Делидегі ел парламентінің орталық залында өтті, деп хабарлайды ҚазАқпарат ТАСС агенттігіне сілтеме жасап.

«Тәуелсiздiктiң 75 жылдығында маған осы қызметке келу бақыты бұйырды. Бізге, тәуелсіз Үндістан азаматтарына азаттық жолындағы күрескерлеріміздің үмітін ақтау үшін күш-жігерді арттыруға тура келеді», - деді Мурму ант қабылдағаннан кейін президент ретіндегі алғашқы сөзінде.

Президент сайлауы 18 шілдеде өтті. Оған ел парламентінің жоғарғы және төменгі палаталарының депутаттары, сондай-ақ 28 штат пен екі одақтық аумақтың заң шығарушы жиналыстарының (аймақтық парламенттердің) мүшелері қатысты.

21 шілдеде дауыс саналды, билеуші Бхаратия Джаната партиясы (Үндістан халық партиясы) басқаратын ұлттық демократиялық альянс атынан шыққан Мурму 64 пайыздан астам дауыс жинап, біріккен оппозиция өкілі Яшвант Синхадан әлдеқайда озып кетті.

Бұған дейін Үндістанның 15-інші президенті болып ұлттық-демократиялық альянсының кандидаты 64 жастағы Драупади Мурму сайланғанын хабарлаған болатынбыз.

Фото: © EPA-EFE/DIVYAKANT SOLANKI