Үндістандық компания Түркістан облысында құс шаруашылығын дамытпақ

ТҮРКІСТАН. ҚазАқпарат - Бүгін облыс әкімі Жансейіт Түймебаев Үндістанның Venky's компаниясының өкілдерімен кездесті. Үндістан нарығының 90 пайызға жуығын құс етімен қамтамасыз етіп отырған алпауыт компания өкілдері Түркістан облысына инвестиция салуға ниетті екенін жеткізді, деп хабарлайды ҚазАқпарат тілшісі.

Кездесуде өңір басшысы облысымызда ауыл шаруашылығы саласын дамытуға толық мүмкінік бар екенін жеткізді. Құс шаруашылығын халықаралық деңгейге көтеру арқылы экспорт көлемін арттыруға болатынын айтып, осы салаға жауапты орынбасарларына үндістандық инвестормен іскерлік байланысты нақтылауды тапсырды.

«Түркістан облысы Өзбекстан Республикасымен шектеседі. Өңірден Батыс Еуропа - Батыс Қытай Қытай магистралі өтеді. Жұмыс күші көп әрі табиғаты шаруашылыққа қолайлы. Бірнеше құс фабрикасы бар. Біз әкімдік тарапынан құс шаруашылығын дамытып, кластер құруға әрдайым қолдау көрсетуге дайынбыз. Егер инвесторлар келетін болса, жер және инфрақұрылым мәселесіне де көмек көрсетіледі. Екіжақты жобалар Үндістанға да, Қазақстанға да пайдалы болады деп ойлаймын. Бірлесіп жұмыс істеуге әзірміз», - деді Ж.Түймебаев.
 

Ал, «Venkateshwara Hatcheries Private Limited» (VH group) компаниясының операциялар жөніндегі бас директоры Мұртұза Әли Исмаил Магдум Түркістанға келудегі мақсатын түсіндірді. Инвестордың айтуынша, компания 1971 жылы құрылған. Тек Үндістанда ғана емес, АҚШ және Еуропа елдерінде бірлескен кәсіпорындары мен жобалары бар.

Қазір әлемде Venky's деген брендімен танылған алпауыт компания құс өсірумен, жұмыртқа өндірумен қатар жұмыртқа ұнтағын да кәдеге асырып жүр. Арнайы зерттеу орталықтарында құс шаруашылығына қажетті вакцина шығарумен де айналысады. Осы деректерге тоқталған үндістандық компания басшысы келіссөздер сәтті аяқталса, Түркістан облысында жұмыс бастауға дайын екенін мәлімдеді. Дәлірек айтсақ, «Ордабасы құс» және «Шымкент құс» ЖШС-мен де біріккен жобаларды жүзеге асыруды көздеп отыр.