Үндістанда кілем тоқитын фабрикада қуатты жарылыс болды

АСТАНА. ҚазАқпарат - Сенбі күні таңертең Үндістанның солтүстігіндегі Утхар-Прадеш штатында кілем тоқитын фабрикада қуатты жарылыс болды. Салдарынан кем дегенде 10 адам қаза болды, деп хабарлайды ҚазАқпарат NDTV телеарнасына сілтеме жасап.

Жарылыстың күшті болғаны соншалық фабрика ғимараты жермен жексен болған. Сондай-ақ жақын маңда орналасқан үш тұрғын үй құлады.

Апаттың нақты себебі әзірге белгісіз. Бірақ өнеркәсіптік нысанның аумағында фейерверктер дайындайтын заңсыз цех жұмыс істегені анықталды.

«Жарылыс болған кезде фабрикада адам аз болды. Үйінділердің астында басқа адамдардың болуы екіталай», - деді телеарнаға полиция өкілі Пиюш Шривастава.

Қылмыстық іс қозғалып, тергеу жұмыстары басталды.