Ұлттық ғылым академиясының мәртебесін көтеру керек – Мемлекет басшысы

АЛМАТЫ. ҚазАқпарат – Ұлттық ғылым академиясы ғылыми ой-тұжырым орталығына және сараптама жасайтын беделді мекемеге айналуға тиіс. Академияның 75 жылдығына арналған салтанатты сессия барысында Мемлекет басшысы Қасым-Жомарт Тоқаев осындай ой айтты, деп хабарлайды ҚазАқпарат Ақордаға сілтеме жасап.

«Қара шаңырақтың рөлін арттыру аса маңызды. Сондықтан, оған мемлекеттік мәртебе береміз және бюджет есебінен қаржыландырамыз. Оның қазір атқарып отырған қызметінен басқа да міндеттерін нақты белгілеу қажет. Атап айтқанда, ғылыми басымдықтарды дәл осы құрылым айқындауы керек. Арнаулы гранттар, стипендиялар және сыйлықтар тағайындау құзыреті де Академияға берілгені жөн», - деді Президент.

Осы ретте Мемлекет басшысы ғылымға адалдық мәселесіне баса назар аударды.

«Қазір қоғамда құр атақ үшін ғылыми дәреже алғысы келетіндердің бар екені жасырын емес. Бұл жағымсыз үрдіске айналып барады. Олар, шын мәнінде, ғылыми атаққа ие болғанымен, ғылым жолын жалғастырмайды. Соның кесірінен мемлекеттің қаншама қаражаты босқа кетеді. Бұған біржола тосқауыл қоятын кез келді. Біз ғылымға шынайы берілген азаматтарды ғана қолдауымыз қажет», - деді Қасым-Жомарт Тоқаев.

Бұған дейін Президент бұрғынғы жетістіктерге марқайып отыра беруге болмайтынын айтты.

Сондай-ақ, академиктер барынша ашық әрі әділ сайлануы қажет деді. Ғылыммен айналысатын академиктерге өмір бойы ай сайын стипендия беру мәселесі шешілетінін жеткізді.