Уланып өлген студентке байланысты ҚазҰУ түсініктеме берді
Оқыс оқиға кеше кешкі сағат 20-00 шамасында жатақханада болған.
«Механикалық-математикалық факультетке түскен 1-курс студенті грант бойынша білім алып жатқан. Жатақханада тұратын. Күндіз студенттер ректордың есебін тыңдады. Кешке жатақханада болған. Бұл оқиға кешкі 20-00 шамасында болды. 1-курс студенттерінің бірі досының жағдайы ушығып кеткенін комендантқа хабарлаған. Жедел жәрдем келіп үлгергенше қайғылы жағдай орын алды. Дәрігерлер алдын ала уланудан көз жұмды деген қорытынды шығарды», - деді баспасөз қызметінен.
Оның айтуынша, көз жұмған жігіт туралы ақпарат өте мардымсыз.
«Бұл балалар қыркүйекте ғана оқуға түсіп, жақында ғана бөлме алған. Марқұм Павлодар облысынан көп балалы отбасынан шыққан»,- деді оқу орнынан.
ҚазҰУ қайғы жамылған отбасыға материалдық көмек көрсетуге дайын.
Жас студенттің өлімінің жай-жапсарымен қазір полиция айналысып жатыр.
«Оның қасында 17 жастағы досы болған. Полиция ол баланы қазір алып кетті», - деді баспасөз қызметінен.