Үкіметтік емес ұйымдарға арналған мемлекеттік грант конкурсы басталды
«Үкіметтік емес ұйымдарға 1 млрд 292 млн теңге мемлекеттік грант қаржысы қарастырылып отыр. Мемлекеттік грант конкурсы бүгін басталды және ол 6 бағыт бойынша өтеді. Грант орындалу мерзіміне қарай үшке бөлінеді: қысқа, орта және ұзақ мерзімді. Оның ішінде қысқа және орта мерзім бойынша өтініш 1 ақпанға дейін, ал ұзақ мерзімді грантқа өтініш 15 ақпанға дейін қабылданады», - деді Ғалым Құрман министрліктің Instagram парақшасында өткен тікелей эфир барысында.
Биыл ҮЕҰ-ға 47 мемлекеттік грант қарастырылып отыр. Оның 22-сі қысқа мерзімді, 16-сы орта және 9-ы ұзақ мерзімді жоба.
«Байқауды өткізуде біз оператор рөлін атқарамыз. Мемлекеттік гранттарды бөлуді тәуелсіз сарапшылар бағалап, анықтайды. Конкурс бойынша бағалаудың өз критерийлері бар. Байқауға барлық өңірден үкіметтік емес ұйымдары қатыса алады», - дейді спикер.
Үкіметтік емес ұйымдарға мемлекеттік грант мына 6 бағыт бойынша бөлінеді:
1) халықтың әлеуметтік тұрғыдан осал топтарын қолдау;
2) азаматтық қоғамды дамытуға, оның ішінде үкіметтік емес ұйымдар қызметінің тиімділігін арттыруға жәрдемдесу;
3) азаматтар мен ұйымдардың құқықтарын, заңды мүдделерін қорғау;
4) қоғамдық келісімді және жалпыұлттық бірлікті нығайту;
5) жастар саясаты мен балалар бастамаларын қолдау;
6) отбасылық-демографиялық және гендерлік мәселелерді шешуге жәрдемдесу.
Қатысушылар өтінімді қағаз немесе электронды түрде Қазақстан Республикасы, 010000, Астана қ., Есіл ауданы, Қабанбай батыр даңғылы, 11/5, «Нұрлы Орда» БО, 5-қабат, 504/3 кабинетке және [email protected] электрондық поштасына жолдауы қажет.