Үкімет мемлекеттік реттеу шараларын қатаңдатуы керек – Президент тұрғын үй құрылысы жайлы
«Тұрғын үй құрылысы саласында қордаланған көптеген мәселе бар. Инженерлік инфрақұрылымның жетіспеушілігінен әкімдік тұрғын үй құрылысын біртіндеп бәсеңдетуді ұсынады. Ал, астанада бала туу көрсеткіші жоғары және көшіп келушілер қатары да көп. Құрылыс қарқынын бәсеңдететін болсақ, 30 мыңдай адам жұмыссыз қалатынын ескеруіміз керек. Мұндай мәселелер туындамас үшін қаланың дамуын жүйелі жоспалау қажет», - деді Президент.
Мемлекет басшысы астана тиісті инженерлік инфрақұрылыммен қамтамасыз етілуі және салынып жатқан нысандардың барлығында заманауи энергия үнемдейтін технологиялар қолданылуы тиістігін айтты. Сондай-ақ, шамамен 4 мың үлескердің мәселесі де күн тәртібінен түспегеніне назар аударды.
«Заңнамалық базаның осалдығынан қалада проблемалық нысандар тағы пайда боулы мүмкін. Қазір Астанада 90-нан астам тұрғын-жай кешені рұқсат құжаттарынсыз салынып жатыр. Құрылыс компаниялары мардымсыз айыппұлды төлеп, тұрғындар қаражатын тартуды жалғасыра береді. Үкімет мемлекеттік реттеу шараларын қатаңдатуы керек. Құрылыс салушылардың заңнаманы айналып өтіп, үлескерлер қаражатын тартуына жол бермеу қажет. Бұл жұмысқа Қаржылық мониторинг агенттігі атсалысуы керек», - деді Мемлекет басшысы.
Сондай-ақ, Президент жер телімін бөлу мәселесінде ашықтық болуына талап етті.
«Құзыретті органдарға жер телімін бөлу мәселесінде ашықтық жоғы туралы көп шағым түсіп жатыр. Әңгіме танымал құрылыс компанияларына жасалатын «ерекше» жағдай туралы. Бұл процесс толығымен ашық болуы керек. Жер цифрлық сервистер арқылы және конкурс негізінде берілуі тиіс. Үкіметке әкімдікпен бірге осы мәселемен мықтап айналысуды тапсырамын», - деді Қасым-Жомарт Тоқаев.