UFC келесі турнирі қашан және қайда өтеді

НҰР-СҰЛТАН. ҚазАқпарат - Las Vegas Review-Journal журналы UFC президенті Дэна Уайт промоушеннің келесі турнирі 30 мамыр күні Лас-Вегаста болатынын растағанын жазды. Бұл туралы ҚазАқпарат sports.kz сайтына сілтеме жасап хабарлайды.

Невада штатының Атлетикалық комиссиясы штат аумағында спорт шараларын өткізуді әлі мақұлдаған жоқ. Бірақ Уайттың айтуынша, комиссия Лас-Вегас аумағында турнирді көрерменсіз өткізу идеясын толығымен қолдайды.

Еске сала кетейік, UFC екі апта ішінде үш турнир өткізген болатын. 9 мамырда UFC 249, 14-і күні UFC Fight Night 171 турнирі және 16-сында UFC Fight Night 172 шоуы өтті. Барлық турнир Джексонвиллде (Флорида, АҚШ) болды.

UFC турнирі аясында 30 мамырда ұйымның экс-чемпионы Тайрон Вудли мен Гилбер Бернстің арасында жекпе-жек өтеді.