ҰБТ үшінші аптасы: 146 талапкер тестілеуге смартфон мен шпаргалка алып кірмек болды

АСТАНА. ҚазАқпарат - Биылғы негізгі ҰБТ-ның үшінші аптасы аяқталды. Ұлттық тестілеу орталығы үшінші аптаның аралық қорытындысын таныстырды, деп хабарлайды ҚазАқпарат.

Негізгі ҰБТ басталғаннан бері 127 мың реттен астам тест тапсырылды.

Оның ішінде талапкерлердің 74% - қазақ тілінде, 26% - орыс тілінде, 0,1% - ағылшын тілінде тестілеуден өтті.

ҰБТ басталғалы шекті балды 78% жуық талапкер жинады.

Орташа балл - 69. Ең жоғары балл – 137, оны тестілеудің бірінші аптасында бір талапкер жинаған.

«ҰБТ-ның үшінші аптасында талапкерлер тестілеуді тапсырудың екінші мүмкіндігін пайдаланып жатыр. Сондықтан тестті екі рет тапсырып, балдарын біліп отырған балалар грант конкурсы бойынша сұрақтар қоя бастады. Ең жиі қойылатын сұрақ: Грант ұтып алу үшін қанша балл жинау керек? Грантқа шекті балл деген болмайды және барлығы конкурсқа байланысты екендігін тағы да бір атап өтсем. Бірақ кем дегенде бағдар болу үшін оқуға түсушілер былтырғы нәтижелермен таныса алады. Мысалы, 2022 жылы «Стоматология» ББТ бойынша бір грантқа 25 үміткер болған, ал грант ұтып алғандардың орташа көрсеткіші 134 балды құрады», - деп атап өтті Ұлттық тестілеу орталығының директоры Руслан Емелбаев.

Айта кетейік, ерекше білім беру қажеттілігі бар оқуға түсушілер үшін қолайлы жағдай жасаудың арқасында ҰБТ-ға екі аптаның ішінде 370 талапкер қатысты.

Бүгінгі таңда 146 талапкер смартфон, шпаргалка және басқа да тыйым салынған заттарды алып өту әрекеті салдарынан тест тапсыру мүмкіндігінен айырылды.

Тестілеу кезінде ереже бұзғаны үшін аудиториядан 106 адам шығарылып, олардың нәтижесі жойылды.

Біреудің орнына тест тапсырмақ болған бөтен адамдар анықталған жоқ.

Айта кетсек, 2023 жылғы ҰБТ аяқталғаннан кейін күнтізбелік жылдың 31 қазанына дейін тестілеудің бейнежазбасына талдау жүргізіледі.

Тыйым салынған заттарды пайдалану немесе ережелерді бұзу фактілері анықталған жағдайда түсушінің ҰБТ нәтижесі жойылады.