ТЖМ: Қарлы бұрқасын кезінде 1453 адам құтқарылды, оның 199-ы - бала
«Өздеріңіз білетіндей, соңғы күндері қолайсыз ауа райы салдарынан болған төтенше жағдайды жою жөнінде республикалық штаб құрылды. Бүгінде Қарағанды, Атырау, СҚО Алматы облысы және Нұр-Сұлтан, Алматы қаласы бойынша штаб өз жұмысын жалғастыруда. Соңғы 2 күн ішінде республиканың 8 облысында автожолдардың 111 учаскесі бойынша жол қозғалысына шектеу қойылды. Төтенше жағдай салдарын жою және қолайсыз ауа райы салдарынан қиындыққа тап болған тұрғындарға көмек көрсету мақсатында 40 жылыту бекеті жұмыс істеп, 1 121 техника жұмылдырылды», - деді ТЖМ басшысы Юрий Ильин Орталық коммуникациялар қызметі алаңында өткен баспасөз мәслихатында.
Министрдің мәлімдеуінше, «101» және «112» желісі арқылы көмек сұраған 7 мыңнан астам хабарлама келіп түскен.
«Бүгін сағат 11:00-дегі жағдай бойынша республикалық маңызы бар 2 жол учаскесі және облыстық маңызы бар 12 жол учаскесі бойынша жол әлі де жабық. Жолды тазарту жұмысы жүріп жатыр және жағдай бақылауда. 29-30 наурыз күндері құтқару бөлімінің мамандары 1453 адамды, оның ішінде 199 баланы құтқарып, эвакуациялады», - дейді ол.
Бұған дейін аталған ведомство басшысы ауа райының қолайсыздығынан 8 облыста 289 елді мекеннің жарықсыз қалғанын жеткізді.