Тувада шаурмадан 160 адам уланды

КРАСНОЯРСК. ҚазАқпарат - Ресейге қарасты Тува елінің Кызыл қаласында шаурмадан уланғандар саны 160-ға жетті, деп хабарлайды ТАСС Республиканың денсаулық сақтау министрлігінің баспасөз қызметіне сілтеме жасап. 

«Ауруханаға жеткізілгендер саны бұрынғыша. Олардың жағдайы жақсарды, ауыр халде жатқандар жоқ. Дәрігердің көмегіне жүгінгендер саны 160 адамға жетті. Бүгін тағы бес адам келді, олардың барлығы стационарда ем қабылдап жатыр», - деді денсаулық сақтау министрлігі.
Тувада ішек инфекциясы індеті «Шаурма» қоғамдық тамақтану орнына келушілер арасында шыққан.

Сәрсенбідегі дерек бойынша, зардап шеккендер саны 155-ке жеткен, олардың 80-і ауруханада жатыр (соның ішінде 16 адам тұрақты ауыр халде жатыр).