Түркияның Невшехир қаласында Қазақстанның Тұңғыш Президенті Н.Назарбаев атындағы көше ашылды
Невшехир орталығындағы ең үлкен көшеге Н.Назарбаевтың атын беру қалалық мәслихаттың шешімімен қабылданды.
Іс-шараға Қазақстанның Түркиядағы елшісі Ж.Түймебаев, Невшехир губернаторы А.Саваш, қала мэрі Х.Унвер, Түркия мемлекеттік органдарының, қоғамдық-саяси, ғылыми-академиялық және іскер топтарының, сондай-ақ БАҚ өкілдері қатысты.
Рәсімнің ашылуында губернатор А.Саваш пен қала мэрі Х.Унвер Н.Назарбаевтың басшылығындағы бауырлас Қазақстанның қарқынды дамуы мен жетістіктеріне орай қуаныштарын жеткізді. Президент Н.Назарбаевтың қазақ-түрік қатынастарының және түркі әлемінің нығаюы мен дамуына сіңірген ерен еңбегі атап өтілді. Сондай-ақ Невшехир қаласының орталығындағы ең үлкен көшеге жалпы жұртқа беделді, түркі әлемі көшбасшысы - Қазақстанның Тұңғыш Президенті Н.Назарбаевтың есімін беру Невшехир үшін жоғары мәртебе екендігі атап өтілді және Түркияда Н.Назарбаев атымен аталған алғашқы көше болып табылатынына көңіл аударылды.
Елші Ж.Түймебаев Қазақстан Тәуелсіздігінің және қазақстан-түрік қатынастарының 20 жылдығын мерекелеу қарсаңында қабылданған осы маңызды шешімге, сондай-ақ Түркия халқының Қазақстан Президентінің қажырлы еңбегін лайықты бағалап, Қазақстан халқына көрсеткен терең құрметі үшін өзінің зор алғысын білдірді.