Түркия 25 мемлекеттегі елшілерін ауыстырды

АНКАРА. ҚазАқпарат - Түркия президенті Режеп Тайип Эрдоғанның жарлығымен шет мемлекеттердегі 25 дипломатиялық миссия басшылары тағайындалды, деп хабарлайды ҚазАқпарат «Анадолы» агенттігіне сілтеме жасап.  

Бейсенбі, 20 желтоқсан күні мемлекет басшысы қол қойған төрт жарлық Түрік үкіметінің Resmi Gazete ресми басылымында жарияланды.

Түркияның дипмиссиялар басшылары өзгерген елдер арасында Ресей, Украина және Өзбекстан бар.

Түркия Республикасының Ресей Федерациясындағы елшісі қызметіне Сыртқы істер министрлігінің Консулдық мәселелер жөніндегі департамент басшысы Мехмет Самсар тағайындалды. Ал Киевтегі Түркия елшілігін СІМ Шығыс Еуропа бойынша департамент басшысының орынбасары Ягмур Ахмет Гюльдере басқаратын болады.

Өзбекстандағы Түркия Елшісі болып Мехмет Сурея Эр тағайындалды. Ол бұдан бұрын Түркия үкіметі жанындағы Ынтымақтастық және үйлестіру агенттігі директорының орынбасары (TİKA) қызметін атқарды.