Түркістанға Корея медицина орталығының жұмыс тобы келді
Меморандумға сәйкес, облыстың онколог-дәрігерлері жылына екі рет Корея елінде біліктілігін арттыратын болды. Сондай-ақ түркістандық науқастарға әлемге танымал медициналық орталықта тегін көмек көрсетіледі.
Айта кетейік, профессор Ким Хен Чольдың медицина саласында жеткен жетістіктері көп. Ол Барселона Испан медициналық университетінің бас профессоры, Халықаралық Гепато-панкреато-Биллиарлық қауымдастығының, Азиядағы эндоскопиялық және лапароскопиялық хирургтар қоғамының ресми мүшесі. Жоғары білікті дәрігер өт тас ауруы, өт шығару жолдары, бауыр обыры, ұйқы безі обыры, лапароскопиялық операциялар, сүт безі обыры, эндокринологиялық хирургия, бүйрек және бауыр трансплантациясы сияқты күрделі емдеу мен операцияларын жасайды. Профессор 2011 жылдың маусым айында Кореяда бірінші болып қан құюсыз бауыр трансплантациясы бойынша жоспарланған отаны сәтті өткізген. Профессор Түркістан қаласының Орталық қалалық ауруханасында өткен семинарға да арнайы қатысып, облыс дәрігерлерімен бауыр обырын емдеу бойынша тәжірибесімен бөлісті. Соңынан науқастарды қабылдап, дәрігерлік кеңес берді.