Түркістандық үздік жас түлектер марапатталды

ТҮРКІСТАН. ҚазАқпарат - Бүгін Түркістан облысы әкімінің орынбасары Мәлік Отарбев халықаралық, республикалық ғылыми жоба жарыстары мен пән олимпиадаларында және өнер, спорт жарыстарында үздік көрсеткіштер көрсеткен өңірдегі үздік 40 оқушымен кездесті, деп хабарлайды ҚазАқпарат.

Басқосу барысында облыс әкімінің орынбасары жас түлектерді құттықтап, облыс мерейін асырған талапты түлектерге және оның білікті ұстаздарына алғысын жеткізді.

«Үлкен өмірге басқан қадамдарыңыз құтты болсын! Алдағы емтиханнан сәтті өтіп, таңдаған мамандықтарыңыз бойынша жоғары оқу орындарына түсулеріңізге тілектеспін. Жастар, сіздердің алар асуларыңыз, шығар биіктеріңіз әлі алда! Сіздерді осындай дәрежеге жеткізген ата-аналарыңызға, ұстаздарыңызға үлкен алғысымды айтамын», - деді Мәлік Отарбев.

Өз кезегiнде, түлектер өз жетiстiктерi, алдағы жоспарлары туралы айтты. Сонымен қатар, үздік жас түлектер дипломдар мен бағалы сыйлықтармен марапатталды.

Айта кетейік, 2018-2019 оқу жылында түркістандық оқушылар дүбірлі додалардан 14 алтын, 25 күміс, 42 қола медаль олжалаған.

Алматы қаласында өткен республикалық ғылыми жобалар байқауының қорытындысы бойынша Түркістан облысының құрамасы ең үздік командалардың бірі болып танылды.