Түркістандық полицейлер шетелдіктен героин мен психотроптық заттар тәркіледі

None
ТҮРКІСТАН. ҚазАқпарат – «Жібек жолы» өткізу пунктінде қызметтік итті пайдаланған шекаралық наряд Өзбекстан азаматынан есірткілік заттар тәркіледі, деп хабарлайды ҚазАқпарат Түркістан облыстық ПД баспасөз қызметіне сілтеме жасап.

Түркістан облысы Сарыағаш аудандық полиция бөлімінің 102 арнасына ҚР ҰҚК Шекара қызметінен есірткі тасымалдау дерегі бойынша хабарлама түсті.

«Жібек жолы өткізу пунктінде қызметтік итті пайдаланған шекаралық наряд Өзбекстан азаматын ұстаған. Тексеру кезінде азамат киімінің қалтасында шамамен 2 грамм болатын есірткі заты бар екенін мойындайды.

Ал, тінту жүргізген полицейлер күдіктінің сырт киімінің қалтасынан ішінде есірткіге ұқсас заты бар екі пакетті тапты. Зерттеу қорытындысына сәйкес, пакеттің бірінде салмағы 0,2 грамнан асатын психотроптық зат бар екендігі анықталды. Ал, келесісінде салмағы шамамен 0,04 грамм болатын героин екені расталды.

Қазіргі уақытта осы жайт бойынша ҚР ҚК-нің 286-бабының 2-бөлігі «Айналыстан алып қойылған заттардың немесе айналысы шектелген заттардың контрабандасы» бойынша сотқа дейінгі тергеу амалдары жүргізіліп жатыр. Күдікті қамауға алынды.

Фото: Түркістан облыстық ПД

Соңғы жаңалықтар