Түркістандағы Жүсіп ата кесенесі аумағында сапар орталығы салынады

None
None
ТҮРКІСТАН. ҚазАқпарат - Биыл Түркістан қаласындағы Жүсіп ата кесенесі аумағында демеушілер есебінен сапар орталығының құрылысы басталады, деп хабарлайды ҚазАқпарат «Әзірет Сұлтан» мемлекеттік тарихи-мәдени қорық-музейінің баспасөз қызметіне сілтеме жасап.

Қазіргі таңда орталықты жобалау құжаты әзірленіп жатыр. Жоспар бойынша онда туристер мен зияратшыларға арналған қызмет көрсету орталығы салынады. Ғимарат 4 бөлмеден тұрады, яғни әкімшілік, музей экспозициясы, қонақ бөлмесі және шаруашылық орындары қарастырылған.

Тарихи деректер мен аңыз-әфсаналарда Жүсіп ата Қожа Ахмет Ясауидің жиені әрі замандасы, шәкірті болғандығы айтылады. Оның кесенесі Түркістан қаласынан 25 шақырым жердегі Ескі Иқан елдімекенінде орналасқан. Жергілікті маңызы бар ескерткішке 2005 жылы археологиялық зерттеулер жүргізіліп, құрылыстың іргесі ХV ғасырда қаланғандығы анықталған.

Мәдениет және спорт министрлігінің қолдауымен ҚР Тұңғыш Президенті – Елбасы Нұрсұлтан Назарбаевтың «Болашаққа бағдар: рухани жаңғыру» және «Ұлы даланың жеті қыры» бағдарламалық мақалаларында көрсетілген басымдықтарды негізге ала отырып, Түркістан өңіріндегі тарихи орындарға келген туристерге сапалы қызмет көрсету мақсатында бірқатар жұмыс қолға алынған. Соның ішінде «Әзірет Сұлтан» мемлекеттік тарихи-мәдени қорық-музейінің ұйымдастыруымен демеушілер есебінен Жүсіп ата кесенесінде де туристерді шоғырландыру мақсатында көптеген игі шара жүзеге асырылып жатыр.

Тарихи-мәдени қорық-музейді дамыту, қорық-музейге қарасты тарихи-мәдени ескерткіштерді қайта жаңғырту жұмыстары еліміздегі туризм саласының дамуына серпіліс береді деп күтілуде.


Соңғы жаңалықтар