Түркістанда жоғалып кеткен апалы-сіңлілі 2 оқушы табылды

ТҮРКІСТАН. ҚазАқпарат – Түркістан облысы, Түлкібас ауданында сабаққа кетіп, хабарсыз кеткен апалы-сіңлілі екі жасөспірім табылды, деп хабарлайды ҚазАқпарат тілшісі.

Облыстық ПД баспасөз қызметінің мәліметінше, жалғызбасты ана Түлкібас АПБ қызметкерлеріне 13 және 11 жастағы қыздарының күндізгі сағат 12:30-дар шамасында сабаққа шығып, кейін қайтып оралмағанын айтып, полиция көмегіне жүгінген.

Полиция жылдам шешім қабылдап, іздеу жұмыстарын жүргізді. Іздау шараларына мектеп мұғалімдері мен еріктілер де тартылды. Нәтижесінде жоғалған қыздар сол ауылдан 25-30 шақырым қашықтықта орналасқан көрші елді мекеннен табылды.

Тергеу барысында оқушы қыздардың осыдан бір жыл бұрын көшіп кеткен ауылындағы үйлеріне жаяу жетіп, сондағы достарына барғаны анықталды.