Түркістанда жасөспірімдер арасындағы суицид мәселесі талқыланды

ТҮРКІСТАН. ҚазАқпарат – Түркістан облысында кәмелетке толмағандар арасындағы құқық бұзу мен балалар суициді мәселелері талқыланды. Өңірдің прокурорлары мен білім саласының өкілдері бас қосқан жиынға Қ.А.Ясауи атындағы Халықаралық қазақ-түрік университетінің президенті Б.Абдрасилов пен профессорлық-оқытушы құрамы, полиция департаменті мен қоғамдық даму басқармасының басшылары және үкіметтік емес ұйымдардың өкілдері қатысты, деп хабарлайды ҚазАқпарат тілшісі.

Ұқсас жаңалықтар

Түркістан облысында жазатайым оқиғалар суицид ретінде тіркелген - прокуратура

Солтүстік Қазақстанда қыз бен жігіт орманда асылып қалды Ақтөбеде жасөспірім өз-өзіне қол жұмсады ШҚО-да 7 жасар қызды зорлаған жігіт асылып өлді

Айта кетейік, жуырда ғана Түркістан облысының прокуратурасы мен Қ.А.Ясауи атындағы Халықаралық қазақ-түрік университеті арасында ынтымақтастық туралы меморандум жасалған болатын. Осы келісім негізінде ұйымдастырылған кездесуде қатысушылар өңірдегі өзекті мәселелер мен әлеуметтік маңызы бар құқықбұзушылықтарды сөз етті.

Атап айтқанда, жасөспірімдер арасындағы құқық бұзушылықтар мен суицид, алименттер, алаяқтық және басқа да мәселелер талқыланды.

Облыс прокуратурасының арнайы топ жетекшісі А.Нақыпбеков бұл қылмыстардың алдын алу шаралары туралы айтып өтті. Оның сөзінше, бүгінгі таңда прокуратураның бастамасымен полиция департаментінде мамандандырылған тергеу тобы жұмыс істейді. Ал, облыс прокуратурасында осы бағыттағы мемлекеттік органдардың жұмысын үйлестіретін арнайы топ құрылған. Қазір осы бағытта бірлескен іс-шаралар жоспары әзірленіп, жүзеге асырылуда.

Атқарылған жұмыстар осы саладағы жағдайдың жақсаруына оң әсер тигізген. Биылғы 9 айда кәмелетке толмағандар жасаған қылмыс саны 5,8%-ға, ал оларға қарсы қылмыстар 9,2%-ға төмендеген.

Кездесу соңында облыс прокуроры бірлескен іс-шаралар жоспарын орындауға жауапкершілікпен қарап, белсенді азаматтық ұстаным көрсетуге шақырды.