Түркістанда тәуелсіздік жылдарындағы елдің жеткен жетістіктері талқыланды
«Тәуелсіз Қазақстан: Жасампаздыққа толы жылдар. Түркістан облысының басты жетістіктері» тақырыбында өткен жиынға облыс әкімінің орынбасары Сәкен Қалқаманов және өңірдегі тарихшы, ғалымдар, саясаттанушылар мен қоғам қайраткерлері қатысты.
«Биылғы жыл еліміз үшін ең елеулі оқиғалардың бірі – Тәуелсіздіктің 30 жылдық мерейтойы. Кешегі ата-бабаларымыздың төккен тері мен қан майдандарда аққан қанының өтеуі – бүгінгі Тәуелсіздік. Қаншама қилы кезеңдерді басынан кешіп, ұрпаққа бейбіт күнді сый еткен бабаларымыздың аманатына адалдық таныту – біздің ең үлкен борышымыз. Қазақстан Тәуелсіздігінің тарихында Елбасы Нұрсұлтан Назарбаевтың алар орны ерекше. Аса көрегенділікпен жүргізілген мемлекеттік саясаттың нәтижесінде біз төрткүл дүниемен терезесі тең, шекарасы айқын, еркін елге айналдық. Елбасы жарлығымен Түркістан облысының қайта құрылып, рухани шаһарға облыс орталығы мәртебесі берілуі – Тәуелсіздіктің айтарлық бір жемісі. Жарлықтың жарық көргеніне үш жылдан аса ғана уақыт өтсе де, Түркістан ажарлы қалаға айналып келе жатыр. Қала келбетіне көрік қосатын ғимараттардың алғашқылары пайдалануға беріліп, өз жұмысын бастады. Енді біздің алдымызда сол ғимараттарды ел игілігі жолында пайдаланып, артылған сенімді ақтау міндеті тұр»,- деді Сәкен Қалқаманов.
Тарих ғылымдарының докторы, профессор Хазретәлі Тұрсын осы жылдар ішіндегі өңірдегі кәсіпкерлік саласының дамып, жастарға жасалған қамқорлықтың артқаны пен Түркістанды түлетудегі Елбасының орны айрықша екендігін атап өтті. Сонымен қатар, басқосуда елдегі этносаралық тұрақтылықтың сақталуы мен инвестициялық өсім, Түркістан облысын дамытудағы Елбасының еңбегі жөнінде ойлар ортаға салынды. Бұл бағыттағы ұсыныс-пікірлер тыңдалды.