Түркістанда қыз ұзату жасаған тұрғын жазаға тартылды

ТҮРКІСТАН. ҚазАқпарат - Түркістан қаласында жергілікті тұрғын мейрамханалардың бірінде қыз ұзату тойын жасаған. 60 адам жинап, құдалық тойын өткізген азамат әкімшілік жауапкершілікке тартылды, деп хабарлайды ҚазАқпарат тілшісі.

Облыстық ПД баспасөз қызметінің мәліметінше, аталған мейрамханаға учаскелік полицейлер барған. Тойды тоқтатып, қонақтарға түсіндіру жұмыстарын жүргізген.Жиналғандарды тарқатып, мейрамхана иесі мен құдалық тойын ұйымдастырушысына қатысты ҚР ӘҚБтК-нің 425-бабымен хаттама толтырған. Іс-құжаттарды жинақтап, заңды шешім қабылдау үшін Түркістан қалалық СЭББ-ға жолдаған. Сонымен қатар карантин талаптарын қадағалау мақсатында жүргізілген рейд барысында, Түркістан қаласында орналасқан азық-түлік дүкендерінде де бірқатар кемшіліктерге жол беру деректері анықталған.