Түркістанда коронавируспен күресте ерекше көзге түскен медқызметкерлер марапатталды
Аймақтың бас дәрігері Марат Пашимов өңірдегі эпидемиологиялық жағдайдың тұрақталуына сүбелі үлес қосқан ақ халаттыларға алғыс айтып, қуанышымен құттықтады.
Салтанатты шарада облыстық клиникалық ауруханасының дәрігері Вячеслав Цой – үздік дәрігер, Түркістан қалалық орталық ауруханасының мейірбикесі Эльмира Сейітова – үздік мейірбике атанды.
Ал, №1 облыстық перинаталдық орталығы – үздік медицина мекемесі деп танылды.
«Әлемді әбігерге салған коронавирус ауруы елімізге де көп қатер тудырды. Өткен жыл жалпы халыққа ауыр болғаны белгілі, әсіресе денсаулық сақтау саласының қызметкерлеріне қиын болды. Осы қиындықты ел болып жеңе білдік. Бұл менің ғана марапатым емес, барлық әріптестеріме көрсетілген құрмет деп білемін. Осы бір еңбегімізді елеп, мейрейімізді асырып отырған Қоғамдық денсаулық басқармасына мол алғыс айтқым келеді. Енді мұндай жайсыз жағдайлар болмаса екен деп тілеймін», – дейді Түркістан қалалық орталық ауруханасының мейірбикесі Э.Сейілханқызы.
Айта кетейік, өңірде денсаулық сақтау саласында жалпы 23 585 маман жұмыс істейді. Қазіргі таңда облыста 88 науқас коронавирус ауруына байланысты ем қабылдауда.
