Түркістанда браконьерлерден 160 келі балық тәркіленді

ТҮРКІСТАН. ҚазАқпарат – Тәртіп сақшылары Шардара су қоймасының Аққұм учаскелік аумағында тоқтатылған күмәнді автокөліктен 160 келі заңсыз ауланған балық тәркіледі, деп хабарлайды ҚазАқпарат polisia.kz телеграм каналына сілтеме жасап.

Тәртіп сақшылары Шардара су қоймасының Аққұм учаскелік аумағында күмәнді Volkswagen Passat автокөлігін тоқтатып, жүргізушінің құжаттарын тексерген. Көліктің жүк салғышынан заңсыз ауланған 3 қап балық табылды. Күдіктіден 1 үрмелі қайық, балық аулауға арналған құралдар мен жалпы салмағы 160 келі түрлі балық тәркіленді.

ҚР ҚК-нің 335-бабымен сотқа дейінгі тергеп-тексеру амалдары басталды.

Табиғатқа залал келтірген тұрғын полиция бөліміне жеткізілді.