Түркістан облысының Сайрам ауданында туризм қос бағытта дамиды
Баспасөз мәліметтеріне қарағанда, Сайрам ауданында бүгінде 8 туристік нысан орналасқан. Оның 6-уы қонақ үй, «Манкент» шипажайы және жеке меншіктегі емдік сауықтыру орталығы. Сондай-ақ, ауданда «Сиқым баба» кесенесі мен «Жаныс баба» мавзолейі бар.
«Туризмді әлемдегі ең табысты бизнестің бірі. Оның маңыздылығы жыл санап артып келеді. Аталған сала көп елдерде жалпы ішкі өнімнің қалыптасуына, қосымша жұмыс орнын құруға, сондай-ақ сыртқы сауданың белсенділігіне ықпал етеді. Жалпы, туризм саласы басқа да салалардың дамуына мол мүмкіндік береді. Мәселен, туристік агенттіктер, мейрамханалар, шипажайлар, тамақтану орындары, көлік байланысын айтуға болады», - деп хабарлайды Сайрам ауданы әкімінің баспасөз қызметі.
Аудан әкімдігінің баспасөз деректеріне қарағанда, Түркістан облысының және Шымкент қаласының жұртшылығы Сайрам ауданындағы Ақсу өзенінің бойынан орын тепкен жазғы демалыс орындарына жиі келетіні рас. Қазіргі таңда ондай орындардың 14-і маусымдық үлгіде жұмыс істеп келеді.
Ауданда туристік маршрут дайындалған. Аталған маршрутқа «Манкент» шипажайы, «Сиқым баба» және «Жаныс баба» кесенелері енгізіліп отыр. Туристік маршруттардың бойында инфрақұрылымды жетілдіру мақсатында Сайрам ауданы бойынша «Батыс Еуропа - Батыс Қытай» халықаралық көлік дәлізі бойында 11 қызмет көрсету нысаны орналасып, қызмет көрсетуде.
Ағымдағы жылы туризм саласын екі бағытта дамыту жоспарланып отыр. Біріншісі - сауықтыру туризмі. Аудан Шымкент қаласына жақын орналасқандықтан және «Батыс Еуропа - Батыс Қытай» халықаралық көлік дәлізі аудан орталығына жақын болуына байланысты, емдік-сауықтыру туризмі жақсы дамып отыр. Осы жылы Ақсу ауылдық округіне қарасты «Ақсукент 2» ауылында 3 қабатты оңалту, сауықтыру орталығын іске қосу жоспарланған. Жобаның құны - 500 млн.теңге.
Екіншісі - мәдени тарихи ескерткіштер. Халық арасында «Сайрамда бар сансыз баб, Отырарда отыз баб, Түркістанда түмен баб, баптардың бабы Арыстан баб, ең үлкені Хален баб» деген тәмсіл кең тараған. Осыған орай, 2017 жылы туристік маршрут дайындалып, оған жоғарыда аталған үш нысан енгізілген. Осы бағытқа Қарамұрт ауылдық округінде орналасқан Қытай тарихнамасында «садағы мен семсері» қолынан түспеген қаһарман қолбасшы болған «Хален бап» және Көлкент ауылында орналасқан Қазақ ханы Абылайханның бекінісі болған «Ханқорған төбесін» туристік маршрут тізіміне енгізіп, оларды жан-жақты дамыту, насихаттау жұмыстары жүргізіліп жатыр.