Түркістан облысының Мақтаарал ауданында 7 мектеп салынып жатыр

ТҮРКІСТАН. ҚазАқпарат - Түркістан облысындағы Мақтаарал ауданының орталығы Мырзакент кентінде абаттандыру, жарықтандыру жұмыстары мен жол, аяқжол құрылыстары жүргізілетін болады, деп хабарлайды ҚазАқпарат облыс әкімінің баспасөз қызметіне сілтеме жасап.

Мақтаарал ауданында республикалық бюджет есебінен 2 мектеп және облыстық бюджет есебінен 5 мектептің құрылыс жұмыстары жүргізілуде.

Сонымен қатар, қазіргі таңда 39 елді мекеннің бас жоспары жасалуда. Сонымен қатар, мектептер, мәдениет үйлері, әкімшілік ғимараттары, көпқабатты тұрғын үйлер бой көтеретін болады.

Мырзакентті ұлғайтуға арналған 160 гектар жер теліміне көпқабатты тұрғын үйлер салу үшін биыл егжей-тегжейлі жоспарлау жобасы әзірленуде. Жоба әзірленгеннен соң аталған жер телімі инфрақұрылыммен қамтамасыз етіліп, көпқабатты тұрғын үйлердің құрылыса басталады. Осылайша бірнеше жылдан соң 7-20-25 бағдарламасы аясында мақтааралдықтар баспанаға ие бола алады.

Жаңадан құрылған Мақтаарал ауданының дербес бөлімдерін заманауи ғимаратпен қамтамасыз ету мақсатында Мырзакент кентінен әкімшілік ғимаратының құрылысын бастау үшін сметалық жоба әзірленді. Сондай-ақ, Еңбекші және Жамбыл ауылдық округтерінің орталықтарынан мәдениет ошақтарын дамыту мақсатында 2 мәдениет үйі және кітапхана құрылысына биыл жобалық сметалық құжаттама әзірлеу жоспарланып отыр.

Бірлік ауылдық округі, Пернебаев елді мекенін кеңейтуге бөлінген 5 гектар жер теліміне ауызсу және электр жарығын алып бару үшін жобалық сметалық құжаттама дайындалу үстінде. Ал Жаңа жол және Бірлік ауылдық округтерінде мал өлекселерін тастайтын шұңқыр құрылыстарына жобалық сметалық құжаттама дайындау үшін мемлекеттік сатып алу рәсімдері өткізілді.