Түркістан облысының дәрігерлері кәсіби мереке қарсаңында марапатталды
Жиынға медицина саласының менеджерлері мен дәрігерлер қатысты. Салтанатты шарада біліктілігі және кәсібилігімен көзге түскен дәрігерлер «Үздік хирург» номинациясына - облыстық клиникалық аурухана бас дәрігерінің хирургия бойынша орынбасары Мақсұт Аймағамбетов, «Үздік терапевт» аталымына - Бағила Таштаева ие болды.
«Үздік акушер-гинеколог» №1 облыстық перинаталдық орталығының акушер-гинеколог дәрігер Абдысаттар Дүйсенов болса, «Үздік педиатр» Бақыт Есіркепова және Төлеби аудандық ауруханасының дәрігері Лола Шаншарова «Үздік жалпы тәжірибе дәрігері» атанды.
Сондай-ақ, «Үздік медицина мекемесі» Түркістан облыстық балалар ауруханасы деп танылды.
«Бүгінде бүкіл ел ұстамдылықты талап ететін күрделі кезеңді бастан кешуде. COVID-19 індетінің таралуы тек денсаулық сақтау жүйесінің ғана емес, елдің экономикалық және адами ресурстарының да беріктігін сынауда. Дейтұрғанмен, біз қиын кезеңді еңсердік», – дейді облыс әкімінің орынбасары Арман Сәбитов.
Айта кетейік, аймақта бүгінде жалпы 23 429 медицина қызметкері бар. Оның 5000-нан астамы - дәрігерлер, қалғаны - орта буын мамандары.
Ақ халатты абзал жандардың ерен еңбегінің арқасында өңірде қауіпті індетті жұқтырған 6 324 науқас толық жазылып шыққан.
Дәрігерлердің ерлігі мемлекет тарапынан лайықты бағалануда.
Былтыр ерекше еңбегімен көзге түскен бірқатар медицина қызметкері Мемлекет басшысының шешімімен «Халық алғысы» медалімен марапатталды.
Сондай-ақ, медицина қызметкерлерінің жалақысы 30%-ға көбейіп, дәрігерлердің орташа жалақысы 271 мың теңгеге, ал орта медициналық қызметкерлер жалақысы 162 мың теңгеге дейін өскен.