Түркістан облысындағы су тасқыны кезінде 50 адам қауіпсіз жерге көшірілді
Облыстық ТЖД бастығының орынбасары Ерік Сарыбаевтың сөзінше, толассыз жауған жауын әсерінен 70-тен аса үйдің ауласына су кіріп, 1 мейрамхана мен 16 ғимарат су астында қалды. Суға кеткен үй жануарларының саны анықталуда.
«Құтқару жұмыстарына облыстық төтенше жағдайлар департаментінің 56 және жергілікті атқарушы органдардың 19 қызметкері жұмылдырылды. Олар 15 бірлік техника, 11 мотопомпа күштерімен суды сору және арықтарды тазалау жұмыстарын жүргізуде. Бұдан бөлек, көшелерді, үйлердің аулаларын су басу фактісіне байланысты аудан әкімдігінің жедел желісі іске қосылып, тұрғындар тарапынан хабарламалар түскен жағдайда шұғыл іс-шаралар атқарылуда», - деді Ерік Темірханұлы.
Ал, «Қазгидрометтің» болжамы бойынша бүгін түнде өңірдегі таулы аймақтарда нөсер жауын күтіледі. Сонымен қатар, облыстың солтүстігі мен батысында, күндіз таулы аудандарда найзағай, бұршақ, дауыл болуы ықтимал. Солтүстік-батыстан шығысқа ауысатын жел соғып, найзағай кезінде екпіні 15-20 м/с дейін үдей түспек.