Түркістан облысында заңсыз жолаушы тасымалына қатысты 12 хаттама толтырылды

ТҮРКІСТАН. ҚазАқпарат - Түркістан облысында заңсыз жолаушылар тасымалына тосқауыл қою мақсатында кезекті рейдтік іс-шаралар Ордабасы ауданы және Түркістан қаласында өтті, деп хабарлайды ҚазАқпарат облыс әкімінің баспасөз қызметіне сілтеме жасап.

«Бірлескен рейдтік шараларды облыстық Жолаушылар көлігі және автомобиль жолдары басқармасының ұйымдастырды. Оған Ордабасы ауданы және Түркістан қаласының жолаушылар көлігі және автомобиль жолдары бөлімінің қызметкерлері қатысты. Сондай-ақ, шараға Түркістан облысының Көліктік бақылау инспекциясы мен Түркістан облысының полиция қызметкерлері де атсалысты», делінген хабарламада.

Өткізілген рейд нәтижесінде ҚР «Әкімшілік құқық бұзушылық туралы» кодексіне сәйкес, жолаушылар көлігіне қатысты 12 хаттама жасалды. Сонымен қатар, жолаушылар тасымалымен айналасатын көлік жүргізушілеріне түсіндірме жұмыстары жүргізілді.