Түркістан облысында «Ұлттық мектеп лигасы» басталды
Пандемия салдарынан болған үзілістен кейін командалық спорт сайысы Түркістан қаласында басталды. Төрт команда бақ сынайтын іріктеу туры төрт күнге жалғасады. Сайыс кезінде барлық карантин талаптары қатаң сақталады. Қатысушылардың дене қызуы тексеріліп, арақашықтық сақталған. Ұлттық мектеп лигасы аясында волейболдан мектеп оқушылары арасында ұйымдастырылған қалалық іріктеу ойындарын тамашалауға келген Түркістан облысының әкімі Өмірзақ Шөкеев оқушыларға сәттілік тіледі.
«Адал және жігерлі күш сынасуда жеңіске деген үміттеріңізді үзбеңіздер. Ұдайы шыңдалып, шеберлік пен машықты жинақтауға ұмтылыңыздар. Алдағы уақытта Туымызды әрдайым, әлемнің барлық аймағында жаңа жеңістермен желбіретіп, сіздерге аманат етер ең басты байлығымыз, біздің барша табыстарымыздың кілті – ел бірлігін сақтауға күш салуларуыңызға тілектеспін», – деді облыс әкімі.
Ұлттық мектеп лигасы аясында футбол, баскетбол, гандбол, волейбол спорт түрлерінен өтетін жарыста оқушыларға спорт мектебінен бапкер, кәсіби маман бекітілген. Лига жарыстары чирлидинг, яғни үйлесімді спорт түрі форматында ұйымдастырылады. Әр мектеп командаларының өз логотиптері мен ұрандары жасалған. Командалар арнайы спорттық формаларымен қамтамасыз етілген. Мектеп оқушыларын жарысқа арнайы автобустар тасымалдайды.
Ұлттық мектеп лига жарыстарының негізгі мақсаты – жасөспірімдер арасында бұқаралық спортты дамыту, салауатты өмір салтын насихаттау, оқушылардың бос уақытын тиімді ұйымдастыру. Лига жарыстары барысында жасөспірімдер арасында командалық рух қалыптастыру және ауылдық, аудандық, облыстық деңгейде қоғам өміріне белсене атсалысатын лидер, көшбасшыларды топтастыру. Облыстық спартакиаданың кезеңі қаңтар айында мектепішілік команда жасақталып, аудандық чемпион команда анықталады.
Бұл лигада облыстағы ең үздік деген спортшы оқушылары өнер көрсетеді. Жеңімпаз болған спорт командасы, облыстық, республикалық, халықаралық мектеп оқушылары арасында спорттан жарыстарға қатысып, ел намысын қорғайды. Наурыз айында облыстық чемпионатта әр аудан, қаладан үздік командалар өзара облыстық іріктеуге қатысып, чемпион командалар марапатталады.
