Түркістан облысында төтенше жағдай кезінде той жасаушылар азаймай тұр
2020 жылғы 14 сәуір 16:02

Түркістан облысында төтенше жағдай кезінде той жасаушылар азаймай тұр

ТҮРКІСТАН.ҚазАқпарат – Түркістан облысының полицейлері төтенше жағдай кезінде күшейтілген режимде қызмет атқарып, тәртіпке бағынбай әрі заңға қайшы өрескел әрекет жасаушыларға шара қолдануда. Облыс бойынша төтенше жағдай режимін бұзу бойынша 123 жайт анықталып, 43 тұрғын қамауға алынды, деп хабарлайды ҚазАқпарат тілшісі.

Облыстық ПД баспасөз қызметінің мәліметінше, соттың шешімімен 63 тұрғынға әкімшілік айыппұл салынған. Тағы бір азаматқа ескерту беріліп, 16 тұрғынның ісі сотта қаралуда.

«Бұл құқықбұзушылық жасаған азаматтардың бірі төтенше жағдайға қарамастан той, туған күн, беташар, тұсаукесер жасаған. Өзгелері ойын-сауық орындарын ашып, адамдарды қабылдағаны үшін жауапқа тартылды. Ал, тағы біреулері шектелген уақытта адамдар тобы болып шоғырланғаны үшін ескерту алып жатыр. Сондай-ақ, блокпосттарда қызметте тұрған полицейге қарсылық білдіріп, қамауға түскен тұрғын да бар» делінген хабарламада.

Өңірдегі тәртіп сақшыларының қарқынды жұмыс атқаруы нәтижесінде қылмыстар саны 18,2 %-ға азайған. Қоғамдық орында жасалған құқықбұзушылықтар 25,7 пайызға, көшелерде жасалатын қылмыстар 26,2 пайызға төмендеген.


Ұқсас жаңалықтар
Серіктестер жаңалықтары

Jańalyqtar

Үрдіс

MURAǴAT