Түркістан облысында табылған үңгірден 48 мың жыл бұрынғы тіршілік анықталды
2022 жылғы 2 шілде 15:26

Түркістан облысында табылған үңгірден 48 мың жыл бұрынғы тіршілік анықталды

ТҮРКІСТАН. ҚазАқпарат – Бәйдібек ауданындағы Боралдай жерінде жүргізілген қазба жұмыстары нәтижесінде 48 мың жыл бұрынғы тіршілік анықталды, деп хабарлайды ҚазАқпарат тілшісі.

ҚР Ұлттық музейіне қарасты ғылыми-зерттеу орталығы жүргізген қазба жұмыстары барысында Қаратау жотасынан бұрын-соңды белгісіз болып келген 85 үңгір анықталған. Палеолит дәуіріне тиесілі үңгірлерден тас құралдары мен адамның жақ сүйегі де табылған. Солардың ішінде Бәйдібек ауданына қарасты Боралдай тауындағы Тұттыбұлақ үңгірінен табылған тас ғасырына қатысты деректемелер шетелде зерттеліп жатыр.

«Ұлттық музейдің бас ғылыми қызметкері, тарих ғылымдарының докторы, академик Жәкен Таймағамбетов бастаған қазақ-орыс, қазақ-неміс, қазақ-жапон халықаралық экспедициялары жұмыс істеп жатыр. Үңгірден алынған топырақ пен өзге де құралдарды зерттеген Германиядағы орталықтан сүйінші хабар жетті. Онда шетелдік ғалымдар үңгірден табылған заттардың құнды жәдігер екендігін растады», - дейді Қазақстан Республикасы Ұлттық музейі баспасөз бөлімінің қызметкері Мадина Сабыр.

Алдағы уақытта археолог мамандардан жасақталған экспедиция Қазақстан аумағындағы палеолит ескерткіштерін іздестіру, зерттеу жұмыстарын Түркістан, Жамбыл облыстары мен Шығыс Қазақстанда жалғастырмақ.


Ұқсас жаңалықтар
Түркістан облысындағы 865 шақырым жолдың мерзімінен бұрын тозу қаупі бар
2022 жылғы 8 тамыз 16:19

Түркістан облысындағы 865 шақырым жолдың мерзімінен бұрын тозу қаупі бар

ТҮРКІСТАН. ҚазАқпарат – Түркістанда облыстық маңызы бар 200 шақырым жол ауыр жүк көліктерінің талаптарды сақтамауынан жарамсыз жағдайға түсіп отыр. Тағы 865 шақырым жолдың мерзімінен бұрын тозу қаупі бар, деп хабарлайды ҚазАқпарат тілшісі.

Бұл жолдардың басым бөлігі Сайрам, Ордабасы, Арыс, Қазығұрт, Сауран аудандарында орналасқан. Жыл басынан бері жүргізілген рейдтік іс-шаралардың нәтижесінде заңды бұзған компанияларға 151 млн теңгеден астам айыппұл салынған.

Түркістан облысы бойынша көліктік бақылау инспекциясы тарапынан жасалған талдау көрсеткендей, өңірдегі 160 карьердің 20-сында ғана таразы бар. Ал, қалған 140 карьерде бақылау-өткізу пунктері, жөнелтілетін және келіп түсетін жүктің сапасы мен массасын анықтайтын таразы мен басқа да жабдықтар қарастырылмаған.

«Заңсыз тасымал, жолаушылар қауіпсіздігіне қатысты шағымдар көбейді. Жол полициясы мен көліктік бақылау инспекциясы тарапынан олардың бәрі тексерілуі тиіс. Жолдың сапасын бұзатын ірі жүк көліктеріне де қадағалау күшейтілсін. Әр карьер маңында жүктің салмағын өлшейтін таразысы болуы керек. Жолаушылардың қауіпсіздігі, жолдың сапасы бойынша рейдтер жалғасқаны жөн», - деді облыс әкімі Өмірзақ Шөкеев осы мәселеге қатысты өткен мәжіліс барысында.

Өңірде ендігі кезекте өзеннен тас таситын ауыр салмақты автокөліктер де жаппай тексерілмек. Карьерлерде салмақ өлшейтін таразының орнатылуы қатаң қадағаланады. Заң бұзушылық жасағандардың ісі құзырлы органдарға жолданады.


Жол қозғалысы ережесін 62 рет бұзған түркістандықтың ісі сотқа жолданды
2022 жылғы 5 тамыз 22:31

Жол қозғалысы ережесін 62 рет бұзған түркістандықтың ісі сотқа жолданды

ТҮРКІСТАН. ҚазАқпарат – Түркістан тұрғыны көлігімен 62 рет заң бұзушылық жасаған және 1 миллион 600 мың теңгеден астам айыппұлын төлемеген, деп хабарлайды ҚазАқпарат тілшісі.

Елімізде жол қозғалысы ережелерін өрескел бұзушыларды анықтау мақсатында «Қорғау – қауіпті жүргізуші» жаңа бағдарламасы іске қосылды. Аталған бағдарлама арқылы Түркістан облысының полицейлері жолдағы заң бұзушылықтарды анықтап, жүгенсіз кеткен жүргізушілерді жауапқа тартуды қолға алды.

Мәселен, бүгін полицейдің планшетіне Тәуке хан даңғылы мен Тынышқұлов көшесінің қиылысында «Toyota» маркалы көліктің жалған мемлекеттік нөмір таққаны және төленбей жүрген айыппұлдары бары жөнінде белгі берілді. Дабыл түсісімен полицейлер аталған көлікті тексеру мақсатында тоқтатып, құжаттарын қарады.

«Жүргізуші көлігіне жалған мемлекеттік тіркеу нөмірін таққан. Сондай-ақ, 62 заң бұзушылық жасап, 1 миллион 600 мың теңгеден астам айыппұл бойынша берешегі бар болып шықты. Аталған автокөлік айыптұраққа қойылып, жүргізушіге ҚР ӘҚБтК-нің 590-бабы 4-бөлігімен хаттама толтырылып, сотқа жолданды. Полицейлер тарапынан түсіндіру жұмыстары жүргізілді», - дейді Түркістан облысы полиция департаментінің баспасөз хатшысы Гүлнар Әбдіжаппарова.

Айта кетейік, соңғы 10 тәулік ішінде облыстық полиция департаментінің жедел басқару орталығы мен Түркістан қалалық полиция басқармасының полицейлері бірлесе отырып, жол ережесін бұзған 961 автокөлік жүргізушісін анықтады. Айыптұраққа 148 көлік қойылды. Ал, «Қорғау – қауіпті жүргізуші» бағдарламасы аясында 180 автокөлік тоқтатылып, 109-ы айыптұраққа жеткізілді. 71 автокөлік жүргізушісіне түсіндірме жұмыстары жүргізілді.


Қарағанды облысының археологтары бірегей артефактілер тапты
2022 жылғы 5 тамыз 00:29

Қарағанды облысының археологтары бірегей артефактілер тапты

ҚАРАҒАНДЫ. ҚазАқпарат – Қарағандыда шамамен 2500 жыл бұрынғы ерте темір ғасырының артефактілері көрсетілді. Шет ауданындағы Талды тарихи-археологиялық паркінің аумағындағы қорғандардың бірін қазу кезінде таңғажайып олжалар табылды, деп хабарлайды ҚазАқпарат тілшісі.

Археологиялық экспедициялар киелі жерде тарихи-мәдени мұраны сақтау орталығының көмегімен жүргізілуде. Зерттеулерді облыстық мәдениет, архивтер және құжаттама басқармасы қаржыландырады.

Биылғы дала маусымы Сарыарқаның ерте көшпелілері туралы ұғымды өзгерте алатын олжалармен ерекшеленді. Қызылжартас қорымы маңындағы қорғандардың бірінен темір қалдықтары мен жұмбақ тақтайларға толы қола қазан табылды. Бұл артефактілердің құпиялары әлі де ашу керек.


«Сыртқы белгілері бойынша қорған кейінгі қола дәуіріне ұқсайды: үлкен тастар шеңбер болып қаланған, бірақ ортасында жерлеу болған жоқ. Оларды қазған кезде алдымен объектінің шеті пайда болды. Басында бұл не екенін мүлдем елестете алмадық. Содан кейін шеңберді толығымен тазарттық. Табылған заттың бірегей екенін түсіндік. Орталық Қазақстанда осы күнге дейін мұндай ештеңе табылған емес», – дейді академик Е. А. Бөкетов атындағы Қарағанды университетінің археологиялық экспедициясының жетекшісі, Сарыарқа археологиялық институтының жетекші ғылыми қызметкері Игорь Кукушкин.

Өзінің морфологиялық белгілері бойынша қазан Жетісуда табылған артефактілерге ұқсас.

Талды қазанының салмағы – 25 кг, диаметрі – 41 см, биіктігі – 34 см.


«Ерекше белгілері – үш иінді аяқтары. Әдетте олар жануарлардың тұяқтарымен немесе аяқтарымен аяқталады. Бұл жағдайда тек бір тұяқ қалған. Қазан қатты ысталған. Бұл онда тамақ дайындағандығын білдіреді. Бір қызығы, ішінде темір мен қола бұйымдары көп болды. Шамасы, бұл ат әбзелдері. Айылбастар мен түймелерден басқа, зооморфты бейнелер – жылқының фигуралары, біз оны тигрогрифон деп атадық. Темірдің қалдықтары жылқы маскасы деген болжам бар», – деп түсіндірді Игорь Кукушкин.

Қалпына келтіру-консервациялау жұмыстарын жүргізу үшін Қарағандыға «Қырым аралы» зертханасының негізін қалаушы белгілі маман Қырым Алтынбеков шақырылды. Қазандықтың індегі заттар сандық рентген көмегімен зерттелді, содан кейін ғана оларды мұқият алып шыға бастады.


Тарих беттеріне жарық түсіру үшін әлі де көптеген зерттеулер жасалуы тиіс. Радиокөміртекпен мерзімін белгілеу артефактілердің нақты жасын анықтауға көмектеседі. Талдау үлгілері қазандықтағы күйе және онымен байланысты материалдар болады. Зерттеулер шетелдік зертханаларда жүргізілетін болады.

«Біз Польша, Литва, Ирландия, Румыния, Венгриядағы әріптестерімізбен ынтымақтасамыз: оларда қажетті аппаратура мен мол тәжірибе бар. Ең алдымен, біз датаны анықтаймыз, содан кейін басқа мәліметтерді білеміз. Мұның бәрі уақыт алады», – деді Игорь Кукушкин.


Талды саябағында табылған бұл жалғыз ғана олжа емес. Басқа обадан пышақтар, қанжарлар, тас жебелердің ұштықтары және басқа да ежелгі тұрмыстық заттар табылды.




Jańalyqtar

Үрдіс

MURAǴAT