Түркістан облысында мемқызметтердің 86 пайызы электронды түрде көрсетілген
Түркістан облысында электронды түрде көрсетілген қызметтің үлесі 86 пайыздан асты. Мемлекеттік қызметтердің тізіміне енген 723 қызметтің 389-ы облыста көрсетіледі. Оның 192-сін - жергілікті атқарушы органдар, 197-сін - орталық мемлекеттік органдардың аумақтық бөлімшелері іске асырған.
Бұл туралы 2019 жылы атқарылған жұмысын қорытындылаған ҚР Мемлекеттік қызмет істері агенттігінің Түркістан облысы бойынша департамент басшысы, Әдеп жөніндегі кеңес төрағасы Болат Исақов өңірлік коммуникациялар қызметінде өткен брифингте мәлімдеді.
Департамент басшысының айтуынша, жергілікті атқарушы органдардың көмегімен былтыр 11 709 161 қызмет көрсетіліп, электронды түрдегі қызметтің үлесі 86,1 пайызды құраған. Бұл көрсеткіш 2018 жылмен салыстырғанда 1,1 пайызға артқан.
«Жалпы былтыр Түркістан облысының мемлекеттік қызмет көрсету саласында 73 тексеру жүргізіліп, нәтижесінде 1704 бұзушылық анықталды. Бұл алдыңғы жылмен салыстырғанда 30 пайызға төмен. Осы заңбұзушылықтарды жою мақсатында департамент тарапынан 151 нұсқама енгізіліп, 49 қызметкер әртүрлі тәртіптік жауапкершілікке тартылды», – деді Б.Исақов.
Сондай-ақ, өткен жылы облыста «Цифрлы агент» (Digital agent) мобильді қосымшасы арқылы 150 мәселенің шешімі табылды. Департамент мамандары бақылау бағытында 95 тексеру жұмыстарын жүргізіп, нәтижесінде мемлекеттік қызмет саласындағы 225 бұзушылықты анықтаған. Бұл ретте 66 ұсыныс беріліп, 58 тұлға тәртіптік жазаға тартылған және тексерудің қорытындысымен қызметтік Әдеп нормаларын сақтамаған 8 лауазымды тұлғаның мәселесі Әдеп кеңесінде қаралып, тиісінше тәртіп жазаларға тартылған.
Сонымен қатар, департамент мамандарының қатысуымен мемлекеттік қызмет саласындағы бақылау бағытында 610 жеке және заңды тұлғалардың арызы қаралған. Нәтижесінде құқығын қалпына келтіруді сұраған жеке және заңды тұлғалардың 35 өтініші зерделеніп, 20 жеке тұлғаның құқықтары қалпына келтірілген.
Айта кетейік, жалпы 2019 жылы Әдеп кеңесінің 10 отырысы өткізіліп, кеңес отырысында 123 мәселе қаралған, оның 88-і - тәртіптік іс. Өз кезегінде, Әдеп кеңесі шешімімен тәртіптік жауапкершілікке тарту туралы 58 ұсыныс жолданып, 57 кінәлі қызметшілерге тиісті тәртіптік жаза қолданылған.
Тәртіптік істер 2018 жылмен салыстырғанда 54% өсіп, Әдеп кеңесіне қарауға ұсынылған материалдардың саны өткен жылмен салыстырғанда 7,8 % артқан.