Түркістан облысында қарапайым заттар экономикасы қарқынды дамып келеді

ТҮРКІСТАН. ҚазАқпарат - Түркістан облысы әкімінің орынбасары Мейіржан Мырзалиев «Атамекен» кәсіпкерлер палатасының облыстық филиалында «қарапайым заттардың экономикасы» жобалық кеңсе жиынын өткізді. Онда шағын және орта бизнесті дамыту, инвестиция тарту мәселелері әңгіме арқауына айналды, деп хабарлайды ҚазАқпарат.

Облыс әкімінің баспасөз қызметінен мәлім еткендей, басқосуға өңірдегі «қарапайым заттардың экономикасына» қатысушы 9 бірдей екінші деңгейлі банк жетекшілері қатысты. Олар аталған бағдарламаны іске асырудың тетіктерін кеңінен талқылады. Жеңілдетілген несиелендіруге арналған бағдарламаның жүзеге асуы Мемлекет басшысының ерекше назарында екенін айтқан Мейіржан Мырзалиев, мәселені оңтайлы шешу екінші деңгейлі банктердің жұмысын үйлестіруге тікелей байланысты екенін айтты.

Сондай-ақ, ол облыстық әкімдіктің тарапынан жобаларды жүзеге асыру үшін қаржы институттарына барынша қолдау көрсетілетінін жеткізді.

Өз кезегінде екінші деңгейлі банктердің өкілдері жалпы құны 26,3 млрд теңгелік 15 жобаны қаржыландыруға дайын екендерін мәлімдеді. Осы жобалар барлық жағынан қолдау тапса, жобаларды жүзеге асыру бойынша Түркістан өңірі көшбасшы облысқа айналады.

Сонымен қатар, қатысушыларға кепілдік құралын енгізу бөлігіндегі бағдарламаға енгізілген түзетулер туралы, айналым қаражатын толықтыру үшін қаржыландыру мөлшерін 50 пайызға дейін арттыру жайы айтылды. Одан бөлек, жақын күндері бағдарламаның тиімділігін арттыра түсу үшін тағы бірқатар түзетулер енгізілетіні хабарланды. Бұл өзгеріс несие алған кәсіпкерлерге де оң әсерін тигізетін болады.

Жиынды қорытындылаған әкім орынбасары жобаларды жүзеге асыру барысында кедергілерге тап болған немесе бизнеске қатысты сауалдары бар кәсіпкерлермен ашық диалог жасауға дайын екенін айтты.