Түркістан облысы өнімдерінің керуені Нұр-Сұлтанға аттанды

ТҮРКІСТАН.ҚазАқпарат - ҚР Конституция күніне орай, ағымдағы жылдың 31 тамыз және 1 қырқүйек аралығында Нұр-Сұлтан қаласында тұрақты дәстүрге айналған Түркістан облысы ауыл шаруашылығы өнімдерінің жәрмеңкесі өтеді. Осыған байланысты бүгін түркістандық өнімдердің керуені жолға шықты, деп хабарлайды ҚазАқпарат облыс әкімінің баспасөз қызметіне сілтеме жасап

Жәрмеңкеге 40-қа жуық тауар өндіруші 275 тонна ауыл шаруашылығы өнімдерін халыққа ұсынады. Атап айтқанда, ет және ет өнімдерінен – 52 тонна, көкөніс – 86 тонна, картоп – 11 тонна, сүт өнімдері – 23 тонна, бақша дақылдары – 48 тонна, жеміс-жидек – 21 тонна, балық – 5 тонна, әсел - 4 тонна және 25 тонна өзге де ауыл шаруашылығының өнімдері бар. Олардың жалпы құны 123 млн 545 мың теңгені құрайды. Отандық өнімдер қала тұрғындары мен қонақтарына базар нарқынан 10-15 пайызға төмен бағада сатылымға түсетін болады.

Сондай ақ, «Қазақстанда жасалған» жобасы аясында Жетісай ауданынан «Улугбек» ЖК аяқ киім өнімдерін, Төлеби ауданы «Ленгер Текстиль» ЖШС-і арнайы жұмыс киімдерін, Сайрам ауданы «Алтын адам» ЖШС ерлер костюмдері мен мектеп киімдерін қала тұрғындарына қолжетімді бағада ұсынады.